Qabul jarayonlari bo‘yicha eng ko‘p beriladigan 6 ta savolga javob

Oliy ta‘lim tashkilotlariga qabul jarayonlari bo‘yicha abituriyentlar va ota-onalardan eng ko‘p kelib tushayotgan savollarga Oliy ta‘lim, fan va innovatsiyalar vazirligi tomonidan tashkil etilgan brifingda javob berildi. Quyida 6 ta asosiy savol va ularga berilgan rasmiy javoblarni keltiramiz.

1. Ijtimoiy reyestr uchun 10 foizlik grant qanday taqsimlanadi??

Ushbu imtiyoz faqat abituriyent tanlagan birinchi ustuvor yo‘nalishga nisbatan qo‘llaniladi. Qolgan yo‘nalishlarga mazkur qo‘shimcha grant tatbiq etilmaydi. Shuningdek, imtiyoz faqat kunduzgi ta‘lim shakli uchun amal qiladi. Kechki va masofaviy shakllarda grant ajratilmaydi. Tanlov respublika miqyosida amalga oshiriladi va abituriyent asosiy grant uchun belgilangan o‘tish ballining kamida 80 foizini to‘plashi shart.

2. Grantda o‘qigan talaba SAT bilan yana grant olishi mumkinmi??

Yo‘q. Bir ta‘lim bosqichida davlat granti asosida talabalikka qabul qilingan fuqaro ikkinchi marta davlat granti olish huquqidan foydalana olmaydi. SAT sertifikati bilan boshqa yo‘nalishga qabul qilingan taqdirda ham ikkinchi kursdan avtomatik grantga o‘tish imkoni yo‘q. Bu holat vazirlikning axborot tizimi orqali tekshiriladi.

3. Kontraktda o‘qigan abituriyent grantga da‘vogar bo‘la oladimi??

Ha. Agar abituriyent avval faqat kontrakt asosida tahsil olgan bo‘lsa, u keyinchalik qayta hujjat topshirganda davlat granti uchun tanlovda ishtirok etishi mumkin. Cheklov faqat avval grant asosida o‘qigan shaxslarga nisbatan tatbiq etiladi.

4. Ijtimoiy reyestr granti butun o‘qish davriga beriladimi??

Ha. Ijtimoiy reyestr imtiyozi asosida grantga qabul qilingan talabalar bakalavriatning butun davri mobaynida davlat granti asosida tahsil oladi. Biroq grantning saqlanib qolishi OTM ichki tartib-qoidalari va qonunchilik talablariga rioya etilishiga bog‘liq.

5. O‘qishni ko‘chirishda SAT sertifikati inobatga olinadimi??

Amaldagi tartibga ko‘ra, xorijiy va nodavlat OTMlardan davlat OTMlariga o‘qishni ko‘chirishda milliy va xalqaro sertifikatlar inobatga olinadi. Jumladan, IELTS, TOEFL, Cambridge, TestDaf, Delf-Dalf, HSK, Topik, TYKS va A-level sertifikatlarining belgilangan darajalari tegishli fanlar bo‘yicha tabaqalashtirilgan yoki maksimal ball berilishiga asos bo‘ladi.

6. Tanlov ustuvorligi va maqsadli qabul qanday ishlaydi??

Abituriyent OTM va yo‘nalishlarni tanlashda o‘z qiziqishi, qobiliyati, kasbiy rejalari va o‘tgan yillardagi o‘tish ballarini inobatga olishi tavsiya etiladi. Eng ko‘p o‘qishni istagan yo‘nalish birinchi o‘ringa qo‘yilishi kerak. Maqsadli qabul esa ish beruvchining ehtiyoji uchun mutaxassis tayyorlash shakli bo‘lib, uni tanlagan abituriyent alohida kvotada ishtirok etadi. Bitirgach, shartnomada belgilangan muddat davomida buyurtmachi tashkilotda ishlab berish majburiyatini oladi.