Xorijda yashayotgan vatandosh bolalar endi Alisher Navoiy nomidagi xalqaro o‘zbek tili olimpiadasida qatnashishi mumkin. Vazirlar Mahkamasi 18-may kuni tegishli qarorni qabul qildi.
Olimpiada haqida
Yangi tashkil etilgan xalqaro olimpiada 14–18 yoshdagi, xorijiy davlatlarda istiqomat qiluvchi vatandosh maktab o‘quvchilari o‘rtasida o‘tkaziladi. Ishtirokchilar yakka yoki jamoaviy tarzda, onlayn va oflayn shaklda qatnashishi mumkin.
Olimpiada har yili ikki bosqichda o‘tkaziladi:
- 1-bosqich (test): 30 ta test topshirig‘i, 50 ball bilan baholanadi
- 2-bosqich (yozma ish): Hakamlar taqdim etgan 5 tagacha mavzu orasidan qur‘a orqali tanlangan bitta mavzuda esse yoziladi
Xorijiy davlat terma jamoasi tarkibi 6 nafargacha ishtirokchi va 1 nafar jamoa rahbaridan iborat bo‘ladi. Bir davlatdan 3 tagacha terma jamoa qatnashishi mumkin.
G‘oliblar qanday imtiyozga ega bo‘ladi?
Olimpiada g‘oliblari va sovrindorlari oltin, kumush va bronza medallari, diplomlar hamda esdalik sovg‘alari bilan taqdirlanadi. Ta’kidlash joizki, O‘zbekistonda fan olimpiadasi g‘oliblariga OTMga kirishda imtiyozlar berish amaliyoti mavjud va bu gal ham o‘xshash yondashuv qo‘llanilgan.
Eng muhim imtiyoz: Xalqaro olimpiada g‘oliblari O‘zbekiston oliy ta‘lim tashkilotlarining “Filologiya va tillarni o‘qitish: o‘zbek tili va adabiyoti” yo‘nalishiga umumiy qabul kvotasidan tashqari, davlat granti asosida o‘qishga qabul qilinadi.
Bu nima uchun muhim?
Bu qaror xorijda yashovchi o‘zbek bolalarining ona tiliga bo‘lgan qiziqishini oshirish va o‘zbek tilining xalqaro nufuzini mustahkamlashga xizmat qiladi. Olimpiada har yili oktyabr oyiga qadar yakunlanadi.
Izohlar (0)
Izoh yozish uchun tizimga kiring.