O'zbekistonlik o'quvchilarning xalqaro fan olimpiadalaridagi muvaffaqiyatlari yana bir tarixiy natija bilan to'ldi. Rayhona Tuymurodova 58-Xalqaro kimyo olimpiadasida (IChO 2026) oltin medalni qo'lga kiritdi. Xalq ta'limi vaziri o'rinbosari o'z kanalida bu yutuq haqida alohida faxr bilan yozdi.
2008-yilda Buxoroda tug'ilgan Rayhona poytaxtimizdagi Abu Ali ibn Sino nomidagi ixtisoslashtirilgan maktabning 11-sinfida tahsil oladi. Bu uning ilk yirik xalqaro g'alabasi emas — u 2025-yilda 59-Xalqaro Mendeleyev olimpiadasida kumush medal va 2-Abu Rayhon Beruniy nomidagi xalqaro olimpiadada oltin medalni qo'lga kiritgan. Joriy yilda esa 60-Xalqaro Mendeleyev olimpiadasida ham kumush medalga sazovor bo'lgandi.
Endilikda u 94 davlat yoshlari bellashgan dunyoning eng nufuzli kimyo olimpiadasida eng yuqori cho'qqini zabt etdi. Xalqaro fan olimpiadasi g'oliblari 1 milliard so'mgacha mukofot olishi haqida avvalroq xabar berilgandi.
Yurtimiz qizlarining ilm-fandagi bunday yutuqlari nafaqat ularning shaxsiy g'alabasi, balki butun millatimizning iftixoridir. Ta'lim va ilm-fanga oid eng muhim yangiliklarni InfoEdu.uz orqali muntazam kuzatib boring.
Reklama
Izohlar (0)
Izoh yozish uchun tizimga kiring.