Yevropa komissiyasi bolalarni onlayn muhitda himoya qilishga qaratilgan EU KIDS Act loyihasini qabul qildi. Taklifga ko'ra 13 yoshgacha bolalar ijtimoiy tarmoqlarda akkaunt ocha olmaydi, 13–15 yoshdagilar ota-ona nazoratidagi cheklangan akkauntdan foydalanadi, 15 yoshdan esa mustaqil akkaunt ochish mumkin bo'ladi.
Loyiha Yevropa komissiyasi tomonidan 17-sentabr kuni Strasburgda taqdim etildi. U ijtimoiy tarmoqlar va video almashish platformalaridan tortib, o'yinlar, sun'iy intellekt chatbotlari va ilovalar do'konlarigacha bo'lgan xizmatlarga talablar qo'yadi.
Yosh cheklovlari
Reklama
- 13 yoshgacha — ijtimoiy tarmoqlarda akkaunt ochish taqiqlanadi. Faqat yosh bolalar uchun maxsus video platformalarda ota-ona o'z akkaunti orqali cheklangan foydalanishga ruxsat berishi mumkin, kunlik limit 1 soatgacha;
- 13 yoshdan 15 yoshgacha — vasiy cheklangan “mini-akkaunt” ochib beradi, ota-ona nazorati doim yoqilgan bo'ladi, kunlik foydalanish 1 soat bilan cheklanadi, kontaktlar ota-ona tasdig'i bilan qo'shiladi;
- 15 yoshdan — qonun bo'yicha xavfsiz bo'lishi shart bo'lgan xizmatlarda mustaqil akkaunt ochish mumkin.
Yosh qoidalari xavfli xususiyatlari tasdiqlangan ijtimoiy tarmoq va video almashish xizmatlariga tatbiq etiladi.
Mavjud akkauntlar tekshiriladi
Qoidalar kuchga kirgach 6 oy ichida platformalar mavjud akkaunt egalarining 15 yoshga to'lmaganini tekshirishi, bunday hamda yoshi aniqlanmaydigan akkauntlarni o'chirishi shart. O'zini o'zi e'lon qilgan yosh yetarli hisoblanmaydi: yoshni tasdiqlash uchun sertifikatlangan vositalar, jumladan bepul Yevropa yosh tasdiqlash ilovasi qo'llanadi. Bu vositalar shaxsni aniqlamaydi va kuzatmaydi.
Xizmatlar xavfsiz dizaynda bo'lishi shart
- Cheksiz avtoplay va to'xtash nuqtasisiz scroll, bolani ushlab qolishga qaratilgan bildirishnomalar, ommaviy auditoriyaga post uchun mukofotlar va “streak” mexanikalari taqiqlanadi;
- Tavsiya tizimlari jalb qilishga emas, xavfsizlik, sifat va ruhiy salomatlikka moslashtiriladi, kuzatuvga asoslangan shaxsiylashtirish sukut bo'yicha o'chiriladi;
- Bolaga oldindan tasdiqsiz hech kim xabar yoza olmaydi, u kontakt takliflarida ko'rinmaydi va anonim bloklash imkoniga ega bo'ladi;
- Sun'iy intellekt chatbotlari va kompanionlari sukut bo'yicha o'chirilgan bo'ladi hamda emotsional bog'liqlik yaratadigan dizayn taqiqlanadi.
Bugun farzandlarimiz insoniyat yaratgan eng murakkab texnologiyalardan foydalanmoqda. Ular hech qachon bolalar farovonligi uchun yaratilmagan. KIDS Act bilan isbotlash majburiyatini o'zgartiramiz — xizmatlar xavfsiz ekanini platformalarning o'zi ko'rsatishi kerak.
Ursula fon der Lyayen, Yevropa komissiyasi prezidenti
Jarimalar va nazorat
Isbotlash majburiyati platformalarga yuklanadi. Yevropa Ittifoqida oyiga 45 milliondan ortiq faol foydalanuvchisi bo'lgan yirik platformalar xizmatlari bolalar uchun xavfsiz ekanini komplayens rejasi va mustaqil auditor tekshiruvi orqali ko'rsatishi shart. Talablar buzilganda jarima jami jahon yillik aylanmasining 6 foizigacha yetishi mumkin, tezkor tartib bo'yicha dastlabki xulosalar 30 kunda, yakuniy qaror 90 kunda chiqariladi.
Loyiha Yevropa Parlamenti va Kengashga yuborildi — qabul qilinishi uchun qonunchilik jarayoni boshlanadi. Fransiyada 15 yoshgacha bo'lganlarga ijtimoiy tarmoq taqiqlangani, shuningdek 114 ta ta'lim tizimida maktabda telefon cheklovi joriy etilgani haqida ham yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring