Avgust oyidan ayrim oilalarga beriladigan bolalar nafaqasi to‘xtatiladi

O‘zbekistonda 2026-yilning fevral oyida “Kambag‘al oila” toifasidagi oilalarga tayinlangan bolalar nafaqasi hamda moddiy yordam to‘lovlarining 6 oylik muddati avgust oyida o‘z yakuniga yetadi. Ijtimoiy himoya milliy agentligi bergan rasmiy ma’lumotga ko‘ra, ayrim oilalar uchun ushbu to‘lovlar davom ettirilmasligi yoki butunlay to‘xtatib qo‘yilishi mumkin. Avvalroq belgilangan tartibga ko‘ra, bolalar nafaqasi oluvchilar ro‘yxatidan chiqarilishi bo‘yicha aniq mezonlar amaliyotga joriy etilgan edi. Endilikda to‘lovlarni uzaytirishda oilaning daromadidan tashqari mehnatga layoqatli a’zolarning rasmiy bandlik holatiga alohida e’tibor qaratilmoqda.

Nafaqa va moddiy yordam to‘lovi keyingi oydan boshlab quyidagi ikkita asosiy holatda avtomatik ravishda to‘xtatiladi: • Oiladagi mehnatga layoqatli shaxs oxirgi 6 oy davomida rasmiy ishlamagan bo‘lsa hamda daromad va soliq bazalarida uning bandligi ko‘rinmasa. • Bandlik xizmatlari (Mahalladagi hokim yordamchisi va Kambag‘allikni qisqartirish markazlari) tomonidan taklif etilgan mos keluvchi bo‘sh ish o‘rnini ikki marta yoki undan ko‘p rad etgan bo‘lsa. Ushbu talablar mehnat qilish imkoniyatiga ega bo‘lgan fuqarolarni boqimandalik kayfiyatidan xalos qilish hamda ularni doimiy ish o‘rinlariga yo‘naltirish maqsadida o‘rnatilgan.

Davlat tomonidan ajratilayotgan bolalar nafaqasi va moddiy yordam to‘lovlarining uzluksizligini ta’minlash uchun mehnatga layoqatli oila a’zolaridan biri quyidagi uchta usuldan biri orqali o‘z rasmiy bandligini tasdiqlashi zarur: • Rasmiy ishga joylashish: korxona, tashkilot yoki muassasa bilan rasmiy mehnat shartnomasi tuzib, Yagona milliy mehnat tizimida (YMMT) ro‘yxatdan o‘tish. • YATT sifatida ro‘yxatdan o‘tish: Yakka tartibdagi tadbirkor sifatida davlat ro‘yxatidan o‘tib, belgilangan soliqlarni o‘z vaqtida to‘lab borish. • O‘zini o‘zi band qilish: Soliq organlarida o‘zini o‘zi band qilgan shaxs sifatida ro‘yxatdan o‘tish va ish stajiga ega bo‘lish uchun belgilangan ijtimoiy soliqni (BHMning 1 baravari miqdorida) to‘liq to‘lash.

Kambag‘al oilalarning ijtimoiy axvoli va bandlik ko‘rsatkichlari “Ijtimoiy reestr” axborot tizimi hamda Soliq qo‘mitasi, Bandlik vazirligi va Penziya jamg‘armasi ma’lumotlar bazalari integratsiyasi orqali har oy tahlil qilinadi. Inson omilisiz amalga oshiriladigan bu monitoring fuqaro tomonidan taqdim etilayotgan ma’lumotlarning aniqligini avtomatik ravishda tekshiradi.

Bolalar nafaqasi hamda moddiy yordam vaqtinchalik ijtimoiy ko‘mak vositasi hisoblanadi. Davlatning asosiy maqsadi har bir ehtiyojmand oilaga doimiy nafaqa to‘lab o‘tirish emas, balki ularga barqaror daromad manbalarini yaratish va mehnat orqali kambag‘allikdan chiqib ketishiga ko‘maklashishdir.

Agar oilada rasmiy bandlik holati shakllantirilgan bo‘lsa, 6 oylik muddat tugagach, bolalar nafaqasi va moddiy yordamni uzaytirish uchun “Ijtimoiy reestr” orqali qayta ariza topshirish mumkin. Ariza maxsus davlat xizmatlari portali yoki mahallasidagi ijtimoiy xodim orqali qabul qilinadi. Inson omilisiz o‘tkaziladigan baholash natijasida oilaning daromad darajasi va rasmiy ish o‘rni me’yorlarga mos kelsa, nafaqa to‘lovi yana 6 oy muddatga uzaytirib beriladi. Shu sababli, avgust oyida 6 oylik muddati tugaydigan barcha nafaqa oluvchi oilalarga o‘z vaqtida rasmiy bandlikni ta’minlash va shaxsiy kabinetlarini tekshirib borish tavsiya etiladi.