Magistraturaga qabul: yangi tartib va bosqichlar
2021/2022 o‘quv yilidan boshlab O‘zbekiston Respublikasining davlat oliy ta’lim muassasalari magistratura (klinik ordinatura) mutaxassisliklariga qabul jarayonlari ikki bosqichda amalga oshirilishi belgilandi.
Magistratura imtihonlari qanday o‘tkaziladi?
Qabul jarayoni quyidagi ikki bosqichdan iborat:
- Birinchi bosqich: Oliy ta’lim muassasasi tomonidan tanlangan mutaxassislikka mos fanlar bo‘yicha kirish imtihonlari o‘tkaziladi.
- Ikkinchi bosqich: Davlat test markazi (DTM) tomonidan chet tili bo‘yicha test sinovlari o‘tkaziladi.
Abituriyentlar o'z tanlagan yo‘nalishlar bo‘yicha kirish ballari va qabul shartlari bilan oldindan tanishib chiqishlari tavsiya etiladi.
Chet tili sertifikati bo‘lgan abituriyentlar uchun imtiyozlar
Magistraturaga kirishda chet tili bo‘yicha tegishli darajadagi milliy yoki xalqaro sertifikatga ega abituriyentlar ikkinchi bosqichdagi test sinovidan ozod qilinadi va ularga ushbu fan bo‘yicha maksimal ball beriladi. Agar sizda sertifikat bo‘lmasa, milliy sertifikat sanalarini kuzatib borishingiz muhim.
Natijalarni e’lon qilish tartibi
Mutaxassislik fanlari bo‘yicha imtihon natijalari imtihon o‘tkazilganidan keyin uch kun muddatda oliy ta’lim muassasasi tomonidan DTMga taqdim etiladi va rasmiy veb-saytda e’lon qilinadi. Chet tili test natijalari va yakuniy tanlov natijalari Davlat test markazining rasmiy saytida e’lon qilinadi.
Manba: infoedu.uz sayti ma’lumotlari asosida tayyorlandi.
Izohlar (0)
Izoh yozish uchun tizimga kiring.