Yangi baholash tizimidagi 686 ta maktabga 40 foizgacha ustama beriladi

Maktabgacha va maktab ta‘limi vazirining 2026-yil 23-iyuldagi 267-son buyrug‘i bilan yangi baholash tizimiga o‘tgan maktablar orasidan eng yaxshilariga 40 foizgacha ustama to‘lash tizimi yo‘lga qo‘yildi. Monitoring guruhlari 27-iyuldan boshlab o‘rganishlarni olib bormoqda. Yangi tizimda jami 3 434 ta maktab baholashning yangi tartibiga o‘tgan. Ulardan eng yuqori natija ko‘rsatgan 686 tasi (20 foiz) ustama olish uchun tavsiya etiladi. Avvalroq o‘qituvchilar uchun ustama hujjatlari e’lon qilingandi, endi esa bu maktablarning o‘ziga bevosita tegishli.

1-bosqich: Monitoring guruhi elektron jurnal ma’lumotlari asosida o‘quvchilarning yillik o‘rtacha baholarini tahlil qiladi. Har bir hududdan eng yuqori natija ko‘rsatgan birinchi 20 foiz maktab saralab olinadi. 2-bosqich: Saralangan maktablar 4 ta mezon bo‘yicha tahlil qilinadi — targ‘ibot ishlari, baholashning to‘g‘ri yo‘lga qo‘yilgani, uslubiy birlashmalar faoliyati va so‘rovnomalar natijasi.

Har bir viloyatdan ustamaga tavsiya etiladigan maktablar soni quyidagicha: • Qoraqalpog‘iston — 234 tadan 47 ta • Andijon — 209 tadan 42 ta • Buxoro — 300 tadan 60 ta • Farg‘ona — 210 tadan 42 ta • Jizzax — 164 tadan 33 ta • Namangan — 230 tadan 46 ta • Navoiy — 150 tadan 30 ta • Qashqadaryo — 188 tadan 37 ta • Samarqand — 200 tadan 40 ta • Sirdaryo — 310 tadan 62 ta • Surxondaryo — 236 tadan 47 ta • Toshkent shahar — 326 tadan 65 ta • Toshkent viloyati — 327 tadan 65 ta • Xorazm — 350 tadan 70 ta

Tanlab olingan maktablarning barcha pedagog va rahbar xodimlariga 40 foizgacha ustama beriladi. Natijalar 2026-yil 15-avgustga qadar vazirlikka taqdim etilishi kerak. Agar maktab monitoring guruhi qaroridan norozi bo‘lsa, natijalar e’lon qilingandan keyin 10 ish kuni ichida Apellyatsiya komissiyasiga murojaat qilishi mumkin. Komissiya murojaatni 10 ish kuni ichida ko‘rib chiqadi.