17 ming o’qituvchi O’zbekistonda 1 000 dollardan ortiq maosh olmoqda

O'zbekistonda pedagoglar mehnatini rag'batlantirish va ijtimoiy himoyasini kuchaytirish maqsadida ish haqidan tashqari to'lanadigan ustama va qo'shimcha haqlar soni 2017 yildagi 15 tadan bugungi kunda 40 tadan oshdi. Bu haqda Maktabgacha va maktab ta'limi vazirligi xabar berdi. InfoEdu.uz kuzatuviga ko'ra, ustamalar sonining qariyb uch baravar oshishi o'qituvchilik kasbining moddiy jozibadorligini tubdan o'zgartirmoqda.

Vazirlik ma'lumotlariga ko'ra, O'zbekiston tarixida ilk bor o'qituvchilar ish haqini oshirish ikki bosqichda va tabaqalashtirilgan tartibda amalga oshirilgan. Bugungi kunda pedagoglarni bilimi, kasbiy mahorati va erishgan natijalariga qarab qo'shimcha rag'batlantirish imkoniyatlari kengaytirilgan. Natijada hozir qariyb 17 ming o'qituvchining oylik ish haqi 1 000 AQSH dollaridan ortiqni tashkil etmoqda.

Yetti turdagi ustama miqdorlari

• Direktor jamg'armasi hisobidan 50 foizgacha ustama;
• Fan olimpiadalarida g'olib va sovrindor bo'lgan o'qituvchilarga 150 foizgacha ustama;
• O'quvchisi olimpiada g'olibi bo'lgan o'qituvchilarga 200 foizgacha ustama;
• Sifatli ta'limni ta'minlashda ijobiy natijalarga erishayotgan maktab xodimlariga 40 foizgacha ustama;
• Olis hududlarda ishlayotgan pedagoglarga ish stajidan kelib chiqib 50 foizgacha ustama;
• Ta'lim darajasi yuqori bo'lmagan maktablarda ishlash uchun boshqa hududlardan jalb qilingan pedagoglarga 100 foizgacha ustama;
• Menejerlik sertifikatiga ega maktab direktorlari va ularning o'rinbosarlariga 50 foizgacha ustama.

Ipoteka va attestatsiya imtiyozlari

Shuningdek, 15 yillik mehnat stajiga ega oliy toifali pedagoglar uchun ipoteka krediti bo'yicha boshlang'ich badalning 25 foizgacha qismi 200 milliard so'mgacha mablag' doirasida qoplab berilishi nazarda tutilgan. Attestatsiya natijasida 86 va undan yuqori ball to'plagan pedagoglarga 70 foizgacha ustama to'lanadi. Bundan tashqari, Vazir jamg'armasi hisobidan malakali pedagoglar va ilg'or xodimlarga eng kam oylik ish haqining 5,5 baravari miqdorida ustama to'lash imkoniyati mavjud. Eslatib o'tamiz, o'qituvchilarga 20 foizlik ustama belgilangani haqida avval xabar berilgan edi.