O‘zbekistonda nodavlat oliy ta’lim tashkilotlari uchun talaba qabul qilish tartibi o‘zgaradi. Vazirlar Mahkamasining 403-sonli qaroriga ko‘ra, 2025-yil 1-avgustdan boshlab xususiy oliygohlar faoliyatiga yangi talablar joriy etiladi.
Endilikda nodavlat OTMlar yil davomida cheksiz talaba qabul qilib, ularni keyinroq tizimga kiritish amaliyotini davom ettira olmaydi.
Talabalar HEMIS tizimiga 1-oktyabrgacha kiritiladi
Reklama
Yangi tartibga ko‘ra, qabul qilingan talabalar haqidagi ma’lumotlar har yili 1-oktyabrgacha HEMIS axborot tizimida ro‘yxatdan o‘tkazilishi shart.
Bu talab xususiy oliygohlarda qabul jarayonini aniq muddatga bog‘laydi. Ya’ni nodavlat OTMlar talabalarni istalgan vaqtda qabul qilib, keyinchalik ularni HEMIS tizimiga kiritish imkoniyatiga ega bo‘lmaydi.
Qabul kvotasini vazirlik belgilaydi
Nodavlat oliy ta’lim tashkilotlari uchun maksimal qabul parametrlari vazirlik tomonidan belgilanadi. Bunda oliygohning real imkoniyatlari baholanadi.
Xususan, quyidagi mezonlar inobatga olinadi:
- moddiy-texnik baza;
- auditoriya va infratuzilma imkoniyatlari;
- pedagogik salohiyat;
- o‘quv dasturlarining mavjudligi va sifati.
Belgilangan maksimal qabul parametri o‘quv yili davomida o‘zgartirilmaydi.
Infratuzilmasi yetarli bo‘lmagan OTMlarga cheklov bo‘ladi
Yangi tartib xususiy oliygohlarda ta’lim sifati va talabalar uchun yaratilgan sharoitlarni nazorat qilishga qaratilgan.
Agar oliygohda auditoriyalar, o‘quv binolari, moddiy-texnik baza yoki professor-o‘qituvchilar salohiyati yetarli bo‘lmasa, qabul soni cheklanishi mumkin.
Ayrim hollarda esa bunday OTMlarga yangi talabalarni qabul qilishga ruxsat berilmasligi ham ehtimol qilinadi.
Qabul parametri OTM murojaati asosida belgilanadi
Muhim jihati shundaki, qabul parametrini belgilash jarayoni oliy ta’lim tashkilotining murojaati asosida boshlanadi.
Shundan so‘ng vazirlik nodavlat OTMning imkoniyatlarini baholaydi va unga mos ravishda maksimal qabul sonini belgilaydi.
Bu tartib xususiy oliygohlar faoliyatida shaffoflikni oshirish, talabalar soni va ta’lim sifati o‘rtasidagi muvozanatni ta’minlashga xizmat qiladi.
Izohlar (0)
Izoh yozish uchun tizimga kiring.