Xorijlik abituriyentlar uchun qabulda cheklov yo’q, ro’yxatdan o’tish bepul

Ijtimoiy tarmoqlarda Oliy ta'lim, fan va innovatsiyalar vazirligi davlat va nodavlat oliy ta'lim tashkilotlariga Hindiston hamda Bangladesh fuqarolarini talabalikka qabul qilmaslik bo'yicha og'zaki ko'rsatma bergani haqida xabarlar tarqaldi. Oliy ta'lim, fan va innovatsiyalar vazirligi ushbu ma'lumot haqiqatga to'g'ri kelmasligini bildirdi.

Vazirlikning izohi

Joriy o'quv yilidan boshlab xorijlik abituriyentlarni O'zbekiston oliy ta'lim tashkilotlariga qabul qilish jarayoni “Study in Uzbekistan” yagona elektron platformasi orqali amalga oshirilmoqda. Platforma xorijlik abituriyentlarga O'zbekistondagi oliy ta'lim tashkilotlari, ta'lim dasturlari, qabul shartlari va to'lov miqdorlari haqida yagona manba orqali ma'lumot olish, hujjatlarni elektron tarzda topshirish va ariza holatini kuzatish imkonini beradi.

• Platformada ro'yxatdan o'tish bepul;
• Abituriyent tanlagan oliy ta'lim tashkilotiga bevosita ariza topshirishi mumkin;
• Yangi tizimning maqsadi — qabul jarayonini ochiq va shaffof qilish, abituriyentlarni turli vositachilarga bog'liq holatdan chiqarish.

Xorijiy talabalar oqimi va ta'lim eksporti

Vazirlik O'zbekiston xorijiy talabalar oqimini cheklashdan emas, aksincha, uni kengaytirishdan manfaatdor ekanini bildirdi. Asosiy maqsad — xorijiy talabalar geografiyasini kengaytirish, O'zbekistonning ta'lim olish uchun jozibador mamlakat sifatidagi imkoniyatlarini dunyoning turli davlatlarida targ'ib qilish va ta'lim eksportini barqaror rivojlantirish.

Xorijiy talabalarni qabul qilish hajmi esa har bir oliy ta'lim tashkilotining mavjud imkoniyatlaridan kelib chiqib muassasaning o'zi tomonidan belgilanadi. Bunda o'quv auditoriyalari, o'quv-laboratoriya bazasi, professor-o'qituvchilar salohiyati, talabalar turar joylari va boshqa infratuzilma imkoniyatlari hisobga olinadi.

Xorijlik abituriyentlarga tavsiyalar

Xorijlik abituriyentlarga O'zbekistonda ta'lim olish uchun rasmiy “Study in Uzbekistan” platformasidan foydalanish, qabul shartlari bo'yicha ma'lumotlarni bevosita tanlangan oliy ta'lim tashkilotidan olish va turli vositachilarga asossiz to'lovlarni amalga oshirmaslik tavsiya etiladi.

Vazirlik munosabati

Agar xorijlik abituriyent qabul jarayonida muayyan muammoga duch kelsa, bu haqda platformadagi rasmiy murojaat kanallari orqali xabar berishi mumkin.

Xorijiy talabalar statistikasi

Ta'lim sifatini ta'minlash milliy agentligining axborot-tahliliy sharhiga ko'ra, 2025-yilda mamlakat oliy ta'lim muassasalarida 24 647 nafar xorijiy talaba tahsil olgan. Ularning 13 060 nafari Hindiston fuqarolari bo'lgan. Study in Uzbekistan orqali hujjat topshirgan xorijiy fuqarolar soni oshgani va xorijlik talabalarning uchdan ikki qismi tibbiyotda o'qiyotgani haqida ham yozgan edik.