Bill Geyts kimsasiz orolga olib ketadigan 10 kitobni sanab o’tdi

Microsoft asoschisi Bill Geyts 2016-yilda kitob do'koni va sayti One Grand Books uchun bergan intervyusida kimsasiz orolga olib ketadigan 10 ta kitobini sanab o'tgan. O'n yil oldin aytilgan bo'lsa-da, ro'yxat hanuz o'z ahamiyatini yo'qotmagan: unda ilmiy-fantastik romanlardan tortib matematik tafakkur, biznes, energetika va tarbiyaga oid asarlar bor.

Kimsasiz orolga tushib qolsangiz, buni qachon sodir bo'lishini o'zingiz tanlay olmaysiz. Lekin agar bu yoz men kema halokatiga uchrasam, yaqinda o'qigan beshta ajoyib kitobim va umrbod sevimli besh kitobim yonimda bo'lishini istardim.

Bill Geyts

Geytsning ro'yxati beshta yaqinda o'qilgan kitob va beshta umrbod sevimli asardan tashkil topgan.

Ro'yxatdagi kitoblar

1. Nil Stivenson — “Seveneves”: insoniyat Yerda hayot tugashi arafasida bir necha ming kishini kosmosga yuboradi; ular 5 ming yil o'tib sayyoraga qaytishi kerak bo'ladi.
2. “Qanday xato qilmaslik kerak. Matematik tafakkurning kuchi” — Jordan Ellenberg: matematikaning kundalik hayot, siyosat, tibbiyot va ilohiyotdagi qo'llanilishi haqida.
3. “Sapiens. Insoniyatning qisqacha tarixi” — Yuval Noy Harari: Homo sapiensning paydo bo'lishidan to davlatlar, dinlar va zamonaviy texnologiyalar ta'sirigacha.
4. “Raqobat kuchi” — Reyti Mikitani va Xiroshi Mikitani: Yaponiyaning iqtisodiy inqirozga tushish sabablari va mamlakat raqobatdagi mavqeini tiklash imkoniyatlari haqida suhbat.
5. “Hayot masalasi” — Nik Leyn: hayotning paydo bo'lishi va evolyutsiyaning mavjud energiya miqdori bilan bog'liqligi haqida.
6. “Biznes sarguzashtlari: Uoll-strit olamidan 12 ta klassik hikoya” — Jon Bruks: XX asrdagi Nyu-Yorkning moliyaviy hayoti va biznesdagi yirik yutuqlar tahlili.
7. “Sevgi va mantiq bilan tarbiyalash” — Foster Klayn va Jim Fey: bolalarni sevgi va mantiq tamoyillari asosida tarbiyalashga bag'ishlangan qo'llanma.
8. “Barqaror energetika” — Devid Jey Key Makkey: barqaror energiya manbalariga o'tish masalasi, Buyuk Britaniya energetika tizimi misolida.
9. “Tabiatimizning eng yaxshi farishtalari” — Stiven Pinker: tarix davomida zo'ravonlik darajasi pasayib borgani haqidagi tadqiqot.
10. “Buyuk Getsbi” — Frensis Skott Fitzjerald: Geyts eng ko'p qayta o'qigan roman.

Geytsning ayrim kitoblar haqidagi fikrlari

Insoniyatning Yerda hayot tugashiga bo'lgan munosabati haqida hikoya qiluvchi mazkur roman mening ilmiy fantastikaga bo'lgan muhabbatimni qayta uyg'otdi.

Bill Geyts, “Seveneves” haqida

Matn esda qolarli, sokin va tushunarli uslubda yozilgan — bu mavzudagi kitobdan kutish mumkin bo'lganidan butunlay boshqacha. Ellenbergning asosiy fikri shundan iboratki, biz hammamiz doimiy ravishda matematika bilan shug'ullanamiz.

Bill Geyts, “Qanday xato qilmaslik kerak” haqida

Bu g'oyalar barcha davrlar uchun dolzarb va buyuk kompaniyani boshqarish qoidalari o'zgarmasligini eslatib turadi. Men bu kitobni yigirma yildan ko'proq vaqt oldin o'qiganman va u hanuzgacha biznes haqidagi eng sevimli kitobim bo'lib qolmoqda.

Bill Geyts, “Biznes sarg'uzashtlari” haqida

Ro'yxatning o'ziga xos jihatlari

• Ro'yxatda faqat ikkita badiiy asar bor — “Seveneves” va “Buyuk Getsbi”, qolganlari ilmiy-ommabop va biznes kitoblari;
• “Buyuk Getsbi” — Geyts eng ko'p qayta o'qigan roman: oilasi romandan olingan iqtibosni hatto uyidagi devorga yozdirgan;
• “Biznes sarg'uzashtlari” kitobini Geytsga milliarder Uorren Baffet tavsiya qilgan;
• Tarbiyaga oid “Sevgi va mantiq bilan tarbiyalash” kitobi uch farzandning otasi bo'lgan Geytsga ota-ona bilan farzand o'rtasidagi nizolarni hal qilishda yordam bergan.

Kitob o'qishning ahamiyati haqida Milliarderlar nega kitob o'qishga ko'p vaqt ajratishi va Bill Geytsning yoshlar uchun 11 ta maslahati sarlavhali materiallarimizda ham yozgan edik.