Tasavvur qiling: sertifikatingiz o'qishni ko'chirish uchun zarur bo'lgan o'tish balini to'liq qoplaydi. Masalan, kerakli 94 ball uchun sertifikatlaringiz rosa 94 ball beradi. Hammasi zo'r — testga kirmasangiz ham talab bajarilgan. Ammo shu yerda to'xtab qolsangiz, katta imkoniyatni qo'ldan boy berishingiz mumkin.
O'qishni ko'chirishda sertifikatlar 2026-yildan inobatga olinadi — bu haqda avvalroq batafsil yozilgan edi. Endi esa nima uchun sertifikatingiz yetarli bo'lsa ham test topshirishga arzigulik ekanini tushuntiramiz.
94 ball o'rniga 130 ball to'plash imkoniyati
Sertifikatingiz sizga 94 ball berayapti — bu o'tish uchun yetarli. Lekin test sinovlariga kirib, yana qo'shimcha ball to'plab, natijangizni 130 ballgacha ko'tarishingiz mumkin. Bu degani, siz shunchaki "o'tib ketgan" emas, balki eng yuqori ball to'plaganlar qatoridan joy olasiz. Axir o'zingizni past baholashning nima keragi bor?
Eng yuqori ball hayotiy zaruratga aylanishi mumkin
Endi eng muhim sababga keling. Tasavvur qiling, siz tanlagan universitetga o'qishini ko'chirish uchun haddan ziyod ko'p talaba ariza topshirdi. Oliygoh esa "biz buncha talabani o'qitolmaymiz, xonalarimiz va o'qituvchilarimiz yetarli emas" deb, hammasini ham qabul qilmasligi mumkin.
Bu qonuniymi? Ha, oliygoh bunday huquqqa ega. "Ta'lim to'g'risida"gi qonunga muvofiq, OTM o'z imkoniyatlaridan kelib chiqib qabul qilinadigan talabalar sonini cheklashi mumkin. Va aynan mana shu vaziyatda sizning yuqori balingiz hayot-mamot masalasiga aylanadi — oliygoh eng yuqori ball to'plaganlardan boshlab qabul qiladi.
Albatta, bunday holat har kuni bo'lavermaydi. Lekin hayotda "nima bo'lsa bo'lar" deb yashashdan ko'ra, eng yaxshilar qatorida bo'lishga intilish har doim to'g'ri yo'l. InfoEdu.uz tahlilchilari o'qishni ko'chirish jarayonidagi barcha nozik jihatlarni yoritishda davom etadi.
Reklama
Izohlar (0)
Izoh yozish uchun tizimga kiring.