Maktabda o'quvchilarga faqat o'qituvchi emas, balki maslahatchi ham kerakligini davrning o'zi ko'rsatmoqda. Shu yil 1-oktabrdan boshlab yurtimizdagi maktablarda yangi lavozim — maktab maslahatchisi joriy etilgandi. Endi esa ushbu lavozim uchun ikkinchi tanlov mavsumi yakunlanib, bugun yakuniy natijalar e'lon qilinadi. Maktab maslahatchisi lavozimiga ariza topshirish haqida avvalroq batafsil yozilgandi.
42 ming ariza ichidan saralash
Kelajak markazlari ma'lumotlariga ko'ra, tanlovning ikkinchi mavsumiga jami 42 932 ta ariza kelib tushgan. Shundan talablarga javob bergan 38 303 nafar nomzod test sinovlarida ishtirok etdi. Testda yuqori natija ko'rsatgan 19 294 nafar nomzod esa 6-18-iyul kunlari o'tkazilgan suhbat bosqichiga yo'llanma oldi. Ya'ni ariza topshirgan har ikki kishidan biri suhbatgacha yetib kelgan.
Suhbat bosqichida respublika bo'ylab 7 695 ta umumta'lim maktabi uchun maslahatchilar saralab olindi. Tanlov komissiyasining maxsus tavsiyanomasini olgan nomzodlar bugundan boshlab maktab maslahatchisi sifatida ish boshlaydi. Natijalar tanlov.uzedu.uz platformasi orqali shaxsiy kabinetga yuboriladi.
Maktab maslahatchisi kim bo'la oladi
Bu lavozimga da'vogarlar nafaqat pedagogik bilimga, balki keng ko'lamli ko'nikmalarga ega bo'lishi kerak. Xususan:
- Maktabgacha va maktab ta'limi qonunchiligidan xabardorlik;
- Kamida bitta xorijiy tilning boshlang'ich darajasi;
- Kompyuter savodxonligi (Word, Excel, PowerPoint);
- Internet va zamonaviy axborot texnologiyalaridan mustaqil foydalana olish.
Davlat tilini bilish majburiy — rus, ingliz yoki boshqa chet tillarini bilganlarga esa ustuvorlik beriladi.
InfoEdu.uz jurnalistlari maktab ta'limidagi barcha islohot va yangiliklarni muntazam yoritib boradi.
Reklama
Izohlar (0)
Izoh yozish uchun tizimga kiring.