Joriy o'quv yilidan boshlab maktabning 9 va 11-sinfini tamomlagan bitiruvchilar shahodatnomani qog'oz shaklda emas, elektron tarzda oladi. Vazirlar Mahkamasining qarori bilan joriy etilgan bu tartib hujjat olish jarayonini ancha soddalashtiradi.
Qanday shahodatnomalar elektron shaklga o'tkazildi?
Reklama
Quyidagi hujjatlar o'zbek va ingliz tillarida elektron formatda shakllantiriladi:
- Tayanch o'rta ta'lim to'g'risidagi shahodatnoma
- Umumiy o'rta ta'lim to'g'risidagi shahodatnoma
- Psixik rivojlanishida nuqsoni bo'lgan bolalar uchun ixtisoslashtirilgan maktabni tamomlash sertifikati
Shahodatnomani qanday olish mumkin?
Har yili 20-iyungacha bitiruvchilar elektron platformaga kirib, shaxsini tasdiqlovchi hujjatidagi ma'lumotlarni kiritish orqali shahodatnomani bepul yuklab olishi mumkin.
📌 Alohida muassasaga borish, navbat kutish yoki qo'shimcha hujjat tayyorlash shart emas.
Elektron shahodatnoma qayerlarda qabul qilinadi?
Bu shahodatnoma bitiruvchiga quyidagi muassasalarga hujjat topshirish huquqini beradi:
- Yurtimizdag kollejlar, texnikumlar va oliy ta'lim muassasalari
- Xalqaro bitim imzolagan davlatlar hududidagi ta'lim muassasalari
Dublikat berilmaydi — lekin bu muammo emas
Shahodatnoma yo'qolgan yoki yaroqsiz holga kelgan taqdirda dublikat shahodatnoma berilmaydi. Ammo bu tashvishlanishga sabab emas — bitiruvchi platformadan istalgan vaqtda bepul qayta yuklab olishi mumkin.
Nima o'zgardi, nima yutildi?
| Ilgari | Endi |
|---|---|
| Qog'oz shahodatnoma | Elektron format |
| Muassasaga borish zarur | Platformadan yuklab olish |
| Yo'qolsa dublikat kerak | Istalgan vaqt qayta yuklab olish |
| Faqat o'zbek tilida | O'zbek va ingliz tillarida |
Izohlar (0)
Izoh yozish uchun tizimga kiring.