Kontrakt pulini davlat to‘lab berishi: Kimlar imtiyozga ega?

Kimlarning kontrakt pullari davlat tomonidan to‘lab beriladi?

O‘zbekistonda ijtimoiy himoyaga muhtoj oilalar farzandlari hamda ayrim toifadagi talabalarning to‘lov-kontrakt xarajatlarini davlat tomonidan qoplab berish tartibi joriy etilgan. Bu imtiyoz talabalar uchun o‘qish jarayonini yengillashtirishga qaratilgan.

Davlat tomonidan kontrakt to‘lab beriladigan toifalar

Hukumat qaroriga muvofiq, quyidagi toifadagi abituriyentlar va talabalarning to‘lov-kontrakt summasi qoplab beriladi:

• Mehribonlik uyi yoki Bolalar shaharchasida tarbiyalanganlar;
• “Temir daftar”ga kiritilgan oila farzandlari;
• Ota-ona qaramog‘idan mahrum bo‘lgan va vasiylikka olingan kam ta’minlanganlar;
• “Ayollar daftari”ga kiritilgan ayollar farzandlari;
• I guruh yoki ikkala ota-onasi II guruh nogironi bo‘lgan kam ta’minlangan oilalar farzandlari;
• “Ijtimoiy himoya yagona reyestri”ga kiritilgan oilalar farzandlari;
• Nogironligi yoki salomatligida nuqsoni bo‘lgan o‘quvchi-talabalar;
• Oilasi kam ta’minlangan deb topilgan talabalar.

To‘lov miqdori va shartlari

Ushbu imtiyoz professional ta’lim tashkilotlari, davlat va nodavlat OTMlar hamda xorijiy OTM filiallarining bakalavriat (kunduzgi, sirtqi, kechki) va magistratura (kunduzgi) bosqichida tahsil olayotganlarga tegishli. Xarajatlar yoshlar yetakchisining ijobiy tavsiyasi asosida to‘lov-shartnomasining 50 foizigacha, biroq BHMning 50 baravari (16,5 mln so‘m)dan oshmagan miqdorda to‘lab beriladi.

Istisnolar

Quyidagi hollarda to‘lov-kontrakt qoplab berilmaydi:

• Ikkinchi va undan keyingi mutaxassislik uchun;
• Qo‘shma ta’lim dasturlari asosida o‘qiganda;
• Tabaqalashtirilgan to‘lov-kontrakt asosida ta’lim olayotganda.