Ikkinchi mutaxassislik uchun hujjatlar qabuli boshlandi

2026-yil 10-iyuldan boshlab oliy ma'lumotga ega fuqarolar uchun ikkinchi va undan keyingi oliy ta'lim bo‘yicha hujjatlar qabuli boshlandi.

Amaldagi tartibga ko‘ra, bakalavr diplomiga ega bo‘lgan shaxslar bakalavriat ta'lim yo‘nalishlarida ikkinchi mutaxassislikni to‘lov-kontrakt asosida egallashi mumkin.

Arizalar 10-avgustga qadar (shu kuni ham) my.edu.uz platformasi orqali onlayn tarzda qabul qilinadi.

Onlayn ariza topshirish uchun nimalar kerak?

Ro‘yxatdan o‘tishda nomzod quyidagi hujjat va ma'lumotlarni taqdim etadi:

• fuqarolik pasporti yoki ID-karta ma'lumotlari;
• bakalavr diplomi va uning ilovasining elektron nusxasi;
• o‘qish istagini bildirgan oliy ta'lim tashkiloti;
• tanlangan bakalavriat ta'lim yo‘nalishi.

Hujjatlarni yuborishdan avval barcha ma'lumotlarning to‘g‘riligini tekshirish tavsiya etiladi.

Qabul parametrlari qanday belgilanadi?

Ikkinchi va undan keyingi oliy ta'lim bo‘yicha qabul parametrlari har bir oliy ta'lim tashkiloti tomonidan mustaqil belgilanadi.

Bunda quyidagi omillar inobatga olinadi:

• oliygohning ilmiy-pedagogik salohiyati;
• moddiy-texnik bazasi;
• mavjud ta'lim imkoniyatlari.

Yakuniy qabul parametrlari oliy ta'lim tashkilotining Kengashi tomonidan tasdiqlanadi.

Ikkinchi mutaxassislik qanday asosda o‘qitiladi?

Ikkinchi va undan keyingi oliy ta'lim bo‘yicha o‘qish faqat to‘lov-kontrakt asosida amalga oshiriladi.

Shu sababli nomzodlarga hujjat topshirishdan oldin tanlagan oliygohning qabul talablari, kontrakt miqdori va ta'lim yo‘nalishlari bilan tanishib chiqish tavsiya etiladi.