Hindistonda tibbiyot oliygohlariga kirish uchun o‘tkaziladigan NEET imtihoni savollarining sizib chiqishi ortidan 21 nafar abituriyent joniga qasd qilgan. Bu haqda BBC nashri xabar berdi. Mojaro ortidan Hindiston ta‘lim vaziri iste‘foga chiqdi va millionlab abituriyentlar qayta imtihon topshirishga majbur bo‘ldi.
Nima sodir bo‘ldi
Joriy yilning may oyida NEET imtihoni savollari oldindan tarqalib ketgani sababli hukumat test natijalarini bekor qilib, qariyb 2 million abituriyent uchun qayta imtihon belgiladi. Bu qaror mamlakat bo‘ylab ommaviy noroziliklarga sabab bo‘ldi. Minglab talabalar va yoshlar Dehli ko‘chalarida namoyish o‘tkazib, imtihon tizimidagi mas‘ullar javobgarlikka tortilishini talab qildi.
Reklama
21 yosh hayotga zomin bo‘lgan fojia
BBC ma‘lumotiga ko‘ra, imtihon natijalari bekor qilinishidan keyin kamida 21 nafar yosh joniga qasd qilgan. Ulardan biri 17 yoshli Kahaan Patel bo‘lib, u qayta imtihon o‘tkazilishiga uch kun qolganida yashayotgan uyining oltinchi qavatidan sakrab vafot etgan. Yigit avvalgi imtihondan mamnun bo‘lib, otasiga orzusidagi tibbiyot institutiga kirishiga ishonayotganini aytgan edi. “Mening aybim nima? Imtihonni halol topshirgan minglab o‘quvchilarning aybi nima?” — degan u otasiga.
Yana bir fojia Rajastan shtatida yuz bergan. 23 yoshli Pradeep Kumar oilasining yagona umidi edi. Otasi uning ta‘limi uchun yerini sotgan, bankdan kredit olgan. Pradeep uchinchi urinishida NEET imtihonini muvaffaqiyatli topshirganiga ishongan, biroq test bekor qilingach, o‘z joniga qasd qilgan. “Savollarni puldorlar sotib oladi, halol o‘qigan bolalar esa jabr ko‘radi. Agar imtihon bekor qilinmaganida, o‘g‘lim bugun tirik bo‘lardi”, — deydi otasi.
Oqibatlari
Namoyishlar ortidan Hindiston ta‘lim vaziri Dharmendra Pradhan iste‘foga chiqdi. BBC qayd etishicha, NEET mojarosi ortidan nafaqat imtihon tizimi, balki yoshlarning ruhiy salomatligi va mas‘ul idoralarning javobgarligi ham mamlakatdagi eng muhokama qilinayotgan mavzulardan biriga aylangan.
O‘z farzandini yo‘qotgan Kahaan Patelning otasi namoyishlarda shaxsan qatnashib, “Farzandim gapirmadi. U o‘z joniga qasd qildi. Ammo boshqa yoshlar uning o‘rniga gapirdi”, deydi.
Eslatib o‘tamiz, Hindiston hukumati Telegram orqali imtihon savollari tarqatilgani haqidagi xavotirlar sabab 22-iyunga qadar platformaga kirishni vaqtincha cheklagan edi. Keyinchalik Telegram Hindiston hukumatining messenjerni bloklash haqidagi qarori ustidan sudga murojaat qilgan.
Bu fojia butun dunyo bo‘ylab imtihon xavfsizligi va shaffofligi masalasini yana bir bor kun tartibiga qo‘ydi. Hindistondagi NEET mojarosi imtihon tizimidagi zaifliklar qanday og‘ir oqibatlarga olib kelishi mumkinligining achinarli misoli bo‘lib qoldi.
Hindiston hukumati endilikda imtihon tizimini isloh qilish bo‘yicha keng ko‘lamli choralar ko‘rishni va‘da qilgan.
Izohlar (0)
Izoh yozish uchun tizimga kiring.