2027-yil 1-yanvardan bakalavriatni tamomlagan hamshiralar va tibbiyot og'alariga oylik ustama to'lanadi. Ustama miqdori diplomga bog'liq: bakalavrlar uchun — mehnatga haq to'lashning eng kam miqdorining bir baravari, magistrlar uchun — ikki baravari. Bu Prezidentning 2026-yil 10-sentabrdagi farmoni bilan belgilandi.
Ustama miqdori
| Kim | Ustama | Oyiga |
|---|---|---|
| Bakalavriatni tamomlagan hamshira va tibbiyot og'asi | 1 barobar | 1 360 000 so'm |
| Magistraturani tamomlagan hamshira va tibbiyot og'asi | 2 barobar | 2 720 000 so'm |
| Oilaviy tibbiyot rezidenturasi va shu yo'nalish magistri | 4 barobar | 5 440 000 so'm |
Reklama
Hozirda mehnatga haq to'lashning eng kam miqdori oyiga 1 360 000 so'm etib belgilangan. Ustama lavozim maoshining ustiga to'lanadi. Oilaviy tibbiyot bo'yicha rezidenturani tamomlagan oilaviy shifokorlar va shu yo'nalishda magistraturani tamomlagan pedagog kadrlarga eng kam miqdorning to'rt baravari miqdorida ustama belgilangan.
Ikki yillik dasturlarga qabul bekor qilinadi
2027/2028-o'quv yilidan o'rta tibbiyot xodimlarini tayyorlashning ikki yillik o'quv dasturlariga qabul bekor qilinadi. Hamshiralik ishi negizida “tibbiy hamrohlik ishi”, oliy hamshiralik ishi bakalavriati negizida esa “oliy tibbiy hamrohlik ishi” yo'nalishlari joriy etiladi.
Bu yo'nalishlarni tamomlagan xotin-qizlarga hamshira, erkaklarga tibbiyot og'asi kvalifikatsiyasi beriladi. Oliy tibbiy hamrohlik ishi bo'yicha davlat buyurtmasi qabul parametrlari 2030/2031-o'quv yiligacha har yili kamida 20 foizga oshirib boriladi.
Shu farmon doirasida tibbiyot yo'nalishlariga qabulning minimal chegarasi belgilangani hamda o'rta tibbiyot xodimlari mutaxassisliklari uchun minimal o'tish ballari haqida maqolamizda yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring