Qisqacha mazmun:
Masʼul xodim tanlagan fanlaringizni asosli deb topib, rozilik bersa, xorijiy universitetda tahsil olish jarayonida olingan kreditlarni mahalliy universitetda ham tan olinishi haqidagi kelishuvga (Learning Agreement) imzo chekib berishi kerak bo'ladi.
Free Mover sifatida xorijda o'qimoqchi bo'lsangiz, tanlagan universitetingizdagi kontrakt summasini o'zingiz to'lashingiz kerak bo'ladi.
Free Mover sifatida o'qish uchun eng katta qiyinchiliklar nimalar?
Free Mover talabalar almashinuvi dasturi – xorijda 1 semestr yoki 1 yil o'qish
Bu qanday dastur?
Dastur talabalarga o'zlari tahsil olayotgan oliygoh va xorijiy oliygohlar o'rtasida talaba almashinuvi kelishuvi bo'lmagan hollarda ham 1 semestr yoki 1 yil davomida xorijiy oliygohda o'qish imkoniyatini beradi.
Istalgan universitetda Free Mover sifatida o'qish mumkinmi?
Yo'q. Bir qancha davlatlarda Free Moverʼlarni qabul qiluvchi universitetlar mavjud. Aynan o'sha oliygohlarda 1 semestr/1 yil davomida o'qishingiz mumkin.
Dasturga qanday qatnashsam bo'ladi?
Free Mover sifatida xorijiy oliygohda o'qishga ketish jarayoni quyidagicha:
1-qadam. Universitetlar ro'yxatidan o'zingizga mos universitetni tanlang. Deyarli har bir ishtirok etuvchi universitet saytida Free Moverʼlar uchun alohida sahifa mavjud.
2-qadam. Oliygohning Free Moverʼlar sahifasida ko'rsatilgan kontaktga email yozing. Emailda o'zingizni tanishtirib, universitetda 1 semestr/1 yil davomida Free Mover sifatida o'qishga qiziqishingiz, hujjat topshirish jarayoni va kerakli hujjatlar ro'yxatini so'rashingiz mumkin. Bunday maʼlumotlar odatda sahifada berilgan bo'ladi. Lekin email yozib, yana tasdiqlab olgan maʼqul. Javob kelgach, keyingi qadamga o'tasiz.
3-qadam. Oliygohingiz xalqaro bo'limdagi masʼul xodim bilan ko'rishing. Unga tanlagan oliygohingizda 1 semestr/1 yil Free Mover sifatida o'qish niyatingiz borligini ayting. O'zbekiston sharoitida mahalliy oliygohlardan bu uchun ruxsat olish anchagina qiyin bo'lishi mumkin. Chunki siz xorijda o'qigan 1 semestr/1 yilingiz va olgan baholaringizni mahalliy universitet ham tan olishi kerak bo'ladi. Olingan taʼlim mahalliy universitetda ham, xorijiy universitetda ham tan olinishi uchun imkon qadar o'zingiz o'qigan, o'qiyotgan va o'qiydigan fanlar bir xil bo'lgan yo'nalishni topish kerak bo'ladi.
4-qadam. Mahalliy universitet roziligini olgach, xorijiy universitetdan kerakli kurslarni/fanlarni tanlang. Odatda emailingizga javob yozishganda bunday kurslar ro'yxatini sizga yuborishadi. Yuborishmasa, qayta so'rab oling.
Kerakli kurs/fanlarni tanlagach, universitetingizdagi Free Mover sifatida xorij oliygohida ketishingiz uchun ruxsat beruvchi xodim bilan gaplashing (odatda, xalqaro bo'lim masʼul bo'ladi, xalqaro bo'limdan so'rab olasiz). Xodimga tanlagan kursingiz va fanlaringizni ko'rsating hamda ular mahalliy universitetda o'tiladigan o'quv rejasi fanlari bilan mos ekanligini tushuntiring. Masʼul xodim tanlagan fanlaringizni asosli deb topib, rozilik bersa, xorijiy universitetda tahsil olish jarayonida olingan kreditlarni mahalliy universitetda ham tan olinishi haqidagi kelishuvga (Learning Agreement) imzo chekib berishi kerak bo'ladi. Bu kelishuv mahalliy oliygoh, xorijiy oliygoh va talaba o'rtasida tuziladi.
5-qadam. Xorijdagi universitet uchun kerakli hujjatlarni to'liq to'ldiring va ularni topshiring. Agar qabul qilinsangiz, o'qishga ketishga tayyorgarlik ko'rishni boshlang!
6-qadam. Xorijda o'qib, qaytib kelgach, o'qish davomida olgan barcha baholaringizni (Transcript of Records) mahalliy universitetingizga topshiring. Universitet Learning Agreement asosida xorijda o'qish davomida olgan baholaringizni mahalliy oliygoh baholariga konvertatsiya qiladi (moslab, qabul qiladi).
Xorijda o'qish davomida qandaydir moddiy imtiyoz beriladimi?
Yo'q. Free Mover sifatida xorijda o'qimoqchi bo'lsangiz, tanlagan universitetingizdagi kontrakt summasini o'zingiz to'lashingiz kerak bo'ladi. Borish-kelish, yashash va boshqa xarajatlarni ham o'zingiz qoplashingiz kerak.
Free Mover sifatida o'qish uchun eng katta qiyinchiliklar nimalar?
Bunday qiyinchiliklar quyidagilar:
1. Mahalliy universitetning rozilik berishi.
2. Tanlagan xorijiy universitetingizning sizni qabul qilishga rozilik berishi.
3. Xarajatlar muammosi.
Muammoga duch kelsam, kimdan maslahat so'rasam bo'ladi?
Xarajatlaringiz bilan bog'liq bo'lmagan muammolar yuzasida Free Movers uchun maxsus yaratilgan sayt bilan bog'lanishingiz mumkin. Sayt maʼmuriyati universitetlarning ruxsat berishiga oid muammolar bo'yicha maslahatlar beradi.
Bu yangilik sizga qanday ta'sir qildi? Fikringizni yozib qoldiring.
Javoblar (0 )