Bugun akademik litseylarga hujjat topshirishning soʻnggi kuni

Akademik litseylarga 2026/2027-o‘quv yili uchun hujjatlar qabuli bugun, 10-iyul kuni soat 24:00 gacha davom etadi.

Arizalar my.edu.uz platformasi orqali onlayn shaklda qabul qilinmoqda. Hujjat topshirmoqchi bo‘lgan talabgorlar belgilangan muddat yakunlanishidan oldin ro‘yxatdan o‘tishlari tavsiya etiladi.

10-iyul holatiga ko‘ra, akademik litseylarga 48 233 nafar talabgor ariza topshirgan. Jami qabul kvotasi esa 14 898 o‘rinni tashkil etadi.

Ariza topshirish uchun qanday hujjatlar kerak?

Ro‘yxatdan o‘tishda talabgor tizimga ID-karta yoki tug‘ilganlik to‘g‘risidagi guvohnoma ma'lumotlarini kiritishi kerak.

Shuningdek, quyidagi hujjatlar elektron shaklda (PDF yoki JPEG formatida) yuklanadi:

• 3,5×4,5 sm o‘lchamdagi rangli fotosurat;
• fan olimpiadasi g‘olibligi diplomi (mavjud bo‘lsa);
• chet tili yoki umumta'lim fanlari bo‘yicha milliy yoki xalqaro sertifikat (mavjud bo‘lsa).

Ayrim ma'lumotlar avtomatik olinadi

Ro‘yxatdan o‘tish jarayonida ayrim ma'lumotlar davlat axborot tizimlari orqali avtomatik shakllantiriladi.

Jumladan:

• tug‘ilganlik haqidagi ma'lumotlar — FHDYO bazasidan;
• maktab va shahodatnoma haqidagi ma'lumotlar — e-shahodatnoma.uz axborot tizimidan olinadi.

Akademik litsey va yo‘nalish qanday tanlanadi?

Talabgor ro‘yxatdan o‘tishda uchtagacha akademik litsey tanlashi mumkin.

Bunda barcha tanlangan litseylarda ta'lim tili bir xil bo‘lishi shart. Har bir litsey uchun bittadan mos ta'lim yo‘nalishi tanlanadi.

Qabul quyidagi tartibda amalga oshiriladi:

• agar talabgorning balli birinchi tanlagan litseyga yetarli bo‘lsa, u shu litseyga tavsiya etiladi va ikkinchi hamda uchinchi tanlovlarda ishtirok etmaydi;
• agar birinchi va ikkinchi tanlovga balli yetmasa, ammo uchinchi litseyga yetsa, u uchinchi tanlov bo‘yicha qabul qilinadi.

Chet tili va test hududi ham tanlanadi

Ro‘yxatdan o‘tish vaqtida talabgor:

• qaysi chet tilidan test topshirishini;
• test sinovini qaysi hududda topshirishini

ham belgilaydi.

Shu sababli arizani tasdiqlashdan oldin barcha tanlovlarni diqqat bilan tekshirib chiqish tavsiya etiladi.