Boshlang‘ich sinflarda yangi fanlardan dars berish huquqi
Maktabgacha va maktab ta’lim vazirining yangi buyrug‘iga binoan, endilikda “Boshlang‘ich ta’lim” o‘qituvchilari o‘z sinflarida “Tabiiy fan (Science)”, “Tarbiya” hamda “Informatika va axborot texnologiyalari” fanlaridan dars berishlari mumkin. Bu o‘zgarish o‘qituvchilarning dars yuklamasini optimallashtirishga xizmat qiladi.
Mutaxassisliklar bo‘yicha fanlar taqsimoti
Yangi tartibga ko‘ra, nafaqat boshlang‘ich sinf o‘qituvchilari, balki yuqori sinf mutaxassislari ham tegishli fanlardan dars o‘tishlari mumkin:
- Tabiiy fan (Science): 5-6-sinflarda Geografiya, Biologiya va Fizika o‘qituvchilari dars berishi mumkin. O‘quv jarayoniga tayyorgarlik ko‘rish uchun maktab darsliklarini yuklab olish imkoniyati mavjud.
- Tarbiya fani: 5-11-sinflarda Tarix hamda Milliy istiqlol g‘oyasi va huquq mutaxassisligiga ega pedagoglar dars o‘tishlari mumkin.
Malaka toifasi va ish haqi qanday belgilanadi?
Vazir buyrug‘ida o‘qituvchilarning moddiy manfaatdorligi ham alohida ko‘rsatib o‘tilgan. Jumladan, Tabiiy fan (Science)dan dars beradigan mutaxassislarga ularning amaldagi malaka toifasiga mos ravishda haq to‘lanadi. Agar o‘qituvchining pedagog kadrlar attestatsiyasi natijasida olingan amaldagi toifasi bo‘lsa, u dars beradigan yangi fanlari uchun ham amal qiladi.
Shuningdek, “Tarbiya” fanidan dars beradigan o‘qituvchilarda ushbu fan bo‘yicha alohida malaka toifasi mavjud bo‘lmasa, asosiy mutaxassislik toifasi bo‘yicha maosh hisoblanadi. Agar o‘qituvchida bir vaqtning o‘zida ham asosiy fani, ham “Tarbiya” fani bo‘yicha toifalar bo‘lsa, dars berayotgan fani bo‘yicha tegishli toifa tatbiq etiladi.
Izohlar (0)
Izoh yozish uchun tizimga kiring.