Akademik qarzdor talaba: Kursdan qoldirish tartibi qanday?

Akademik qarzdor talabaning kursdan qoldirilish tartibi

O‘zbekiston oliy ta’lim tizimida joriy etilgan kredit-modul tizimi talabalarning akademik intizomiga qat’iy talablar qo‘yadi. Ushbu tizimda darslarga muntazam qatnashish va o‘quv jarayonini o‘z vaqtida o‘zlashtirish juda muhim. Talabalar uchun ushbu tartib-qoidalarni bilish kelajakdagi kutilmagan akademik qarzdorliklarning oldini oladi.

Kredit-modul tizimida asosiy talablar

Har bir fan ma’lum miqdordagi kreditlar bilan baholanadi. Kredit-modul tizimining asosiy ko‘rsatkichlari quyidagicha:

• Bir fan uchun ajratilgan kredit – 6 kredit
• Bir kreditning soat ekvivalenti – 30 soat
• Bir fanning jami soat hajmi – 180 soat
• Auditoriya mashg‘ulotlari uchun ajratilgan soatlar – 72 soat
• Mustaqil ta’lim uchun ajratilgan soatlar – 108 soat

Talabaning kursdan qoldirilish shartlari

Agar talaba o‘quv rejada belgilangan auditoriya mashg‘ulotlarining to‘rtdan bir qismini (ya’ni 72 soatdan 18 soatini) sababsiz qoldirsa, u yakuniy nazoratga kiritilmaydi. Yakuniy nazoratdan o‘tolmagan talaba esa akademik qarzdor deb topiladi.

Akademik qarzdorlikni bartaraf eta olmagan talaba kursdan qoldiriladi. Bu holatda talaba o‘sha fanni qayta o‘qish uchun to‘lov-shartnoma asosida yoki qayta kursda qolish orqali ta’limni davom ettirishi kerak bo‘ladi. Natijada, bakalavriat bosqichidagi talaba o‘z o‘qishini 8 yilgacha cho‘zib yuborishi mumkin. Oliy ta'lim muassasalarida ta'lim olayotgan har bir talaba ushbu qoidalarga jiddiy yondashishi tavsiya etiladi.

Siz ushbu yangilik va kredit-modul tizimidagi talablar haqida nimalarni o‘ylaysiz? Fikr va mulohazalaringizni izohlarda yozib qoldiring.