Test materiallaridan qanday to‘g‘ri foydalanish kerak? [video]

Davlat oliy va kasbiy ta'lim tashkilotlariga kirish test sinovlarida abituriyentlar test materiallaridan belgilangan tartib asosida foydalanishi lozim. Imtihon boshlanishidan oldin test kitobi va javoblar varaqasini diqqat bilan tekshirish muhim hisoblanadi.

Test boshlanishidan oldin nimalarni tekshirish kerak?

Abituriyent avvalo quyidagilarni tekshirishi zarur:

• javoblar varaqasi o‘ziga tegishli ekanligini;
• test topshiriqlari kitobidagi fanlar majmuasi ruxsatnomada ko‘rsatilgan fanlarga mosligini;
• test kitobida nuqson yo‘qligini.

Shuningdek, test kitobida:

• majburiy fanlar bo‘yicha 10 tadan;
• mutaxassislik fanlari bo‘yicha 30 tadan test topshirig‘i mavjudligi;
• har bir savolda 4 ta javob varianti berilgani;
• kitob sifatli chop etilgani tekshirilishi kerak.

Agar javoblar varaqasi boshqa shaxsga tegishli bo‘lsa, fanlar mos kelmasa yoki test kitobida nuqson aniqlansa, bu haqda darhol guruh nazoratchisiga xabar berish lozim.

Test materiallarini qanday rasmiylashtirish kerak?

Tekshiruvdan so‘ng abituriyent:

• test kitobi va javoblar varaqasiga familiyasi, ismi va otasining ismini yozadi;
• imzo qo‘yadi;
• javoblar varaqasiga test kitobi raqamini yozadi;
• mos doirachalarni belgilaydi.

Fanlar majmuasiga qarab abituriyentlarga quyidagi yordamchi materiallar ham berilishi mumkin:

• kimyoviy elementlar davriy jadvali;
• doimiy fizik kattaliklar va shartli belgilashlar jadvali;
• kimyo, fizika va matematika fanlari bo‘yicha asosiy formulalar jadvali.

Javoblar varaqasini to‘ldirishda nimalarga e'tibor berish kerak?

Test sinovi boshlanganidan keyin abituriyent test topshiriqlarini bajarib, javoblarni javoblar varaqasiga belgilaydi. Test kitobidan qoralama sifatida foydalanishga ruxsat etiladi.

Javoblar varaqasi bilimni baholash uchun asosiy hujjat hisoblanadi. Shu sababli:

• har bir savol uchun faqat bitta javob belgilanadi;
• doiracha to‘liq bo‘yalishi kerak;
• javoblar belgilash namunasi talablariga rioya qilinishi lozim.

Agar bitta savolda ikki yoki undan ortiq javob belgilanadigan bo‘lsa yoki doiracha noto‘g‘ri bo‘yalsa, ushbu savol uchun ball berilmaydi.

Belgilangan javobni o‘zgartirish mumkinmi?

Yo‘q. Javoblar varaqasida bo‘yalgan javoblarni keyinchalik o‘zgartirishga ruxsat berilmaydi.

Agar test topshirig‘i yoki javob variantida xatolik aniqlansa, bu haqda guruh nazoratchisiga xabar berish va e'tirozlar blankasini rasmiylashtirish zarur.

Test materiallarini topshirish tartibi

Abituriyent test sinoviga ajratilgan vaqt ichida barcha topshiriqlarni bajarib, test kitobi va javoblar varaqasini guruh nazoratchisiga topshirishi shart.

InfoEdu.uz eslatishicha, belgilangan vaqt tugaganidan keyin test materiallarini topshirmagan abituriyent test sinovidan chetlashtiriladi va uning natijalari hisobga olinmaydi.