Talaba sinf rahbari bo'la oladimi?
Maktabgacha va maktab ta’limi vazirining 2023-yil 27-iyundagi 190-sonli buyrug‘iga ko‘ra, umumta’lim muassasalarida sinf rahbarlarini tayinlash tartibi belgilab qo‘yilgan. Ushbu tartibga ko‘ra, talabalarga sinf rahbarligini yuklash taqiqlanadi.
Sinf rahbarlarini tayinlash tartibi
Sinf rahbarlari o‘qituvchilar orasidan ta’lim muassasasi direktori tomonidan tayinlanadi va ozod etiladi. Nomzodlar quyidagi mezonlar asosida saralanadi:
- Pedagogik staj: Nomzod kamida 3 yillik pedagogik ish stajiga ega bo‘lishi shart.
- Asosiy ish joyi: Maktabda asosiy ishchi sifatida faoliyat yuritishi kerak. Soatbay yoki o‘rindoshlik asosida ishlovchi o‘qituvchilar sinf rahbari bo‘la olmaydi.
- Boshqaruvchanlik qobiliyati: O‘quvchilar bilan ishlashda mas’uliyatli va tashkilotchilik qobiliyatiga ega bo‘lishi lozim.
Muhim eslatmalar
Boshlang‘ich sinflarda sinf rahbarligi mazkur sinfga biriktirilgan o‘qituvchilarga yuklatiladi va u 1-sinfdan 4-sinfgacha o‘quvchilarga yagona rahbar hisoblanadi. Agar siz pedagogik faoliyatni endi boshlayotgan bo'lsangiz, pedagog kadrlar attestatsiyasi hamda talaba bo'lgan davringizda o'z kasbiy malakangizni oshirishga e'tibor qaratishingiz tavsiya etiladi.
Yuqoridagi mezonlarga javob bermaganligi sababli, talabalarga sinf rahbarligi berilishi mumkin emas. Ushbu ma’lumotlar rasmiy vazirlik buyruqlari asosida tayyorlandi.
Izohlar (0)
Izoh yozish uchun tizimga kiring.