O'zbekiston oliy ta'lim tizimi uchun tarixiy voqea. 2026-yil 17-iyul kuni Harvard Graduate School of Education bilan hamkorlik to'g'risidagi kelishuv imzolandi. Hukumat portali xabariga ko'ra, endilikda "Rektorlar maktabi" dasturining eng yuqori natija ko'rsatgan bitiruvchilari dunyoning eng nufuzli universitetlaridan birida malaka oshirish imkoniyatiga ega bo'ladilar.
Mazkur hamkorlik Vazirlar Mahkamasining 2026-yil 16-apreldagi 177-son qarori bilan tashkil etilgan "Rektorlar maktabi" dasturi doirasida amalga oshirilmoqda. Har yili dasturga qabul qilinadigan 80 nafar tinglovchidan eng yuqori natija ko'rsatgan 40 nafargacha bitiruvchi Harvard hamda dunyoning boshqa yetakchi oliy ta'lim tashkilotlarida malaka oshiradi. Ayni paytda Rektorlar maktabiga qabul tartibi tasdiqlangani haqida ham xabar berilgandi.
Harvard'da nimalar o'rganiladi?
Hamkorlik doirasida tinglovchilar:
- Universitetlarni strategik boshqarish va akademik liderlik;
- Ta'lim sifatini ta'minlash va ilmiy faoliyatni boshqarish;
- Innovatsiyalarni tijoratlashtirish;
- Universitetlarning xalqaro reytinglardagi raqobatbardoshligini oshirish;
- Oliy ta'lim tizimini transformatsiya qilish bo'yicha ilg'or xalqaro tajribalarni o'rganadilar.
Shuningdek, dastur ishtirokchilari Harvard universiteti professorlari va ekspertlari bilan bevosita muloqot qilish, zamonaviy boshqaruv yondashuvlari hamda universitetlar rivojlanishining eng yaxshi amaliyotlari bilan yaqindan tanishish imkoniyatiga ega bo'ladilar. Bu kelishuv O'zbekistonda xalqaro tajribani puxta o'zlashtirgan va strategik fikrlaydigan universitet rahbarlari zaxirasini shakllantirish yo'lidagi eng muhim qadamlardan biri hisoblanadi.
Ta'lim sohasidagi eng muhim yangiliklarni InfoEdu.uz orqali muntazam kuzatib boring.
Reklama
Izohlar (0)
Izoh yozish uchun tizimga kiring.