O‘zbekistonda 1-iyuldan nafaqa va bolalar nafaqasi oshirildi

O‘zbekistonda 2026-yil 1-iyuldan e’tiboran ijtimoiy nafaqalar, bolalar nafaqasi hamda moddiy yordam to‘lovlarining yangi miqdorlari kuchga kirdi. Ijtimoiy himoya milliy agentligi bergan ma’lumotga ko‘ra, bu o‘zgarishlar aholini ijtimoiy qo‘llab-quvvatlash va ehtiyojmand oilalarning turmush darajasini yaxshilashga qaratilgan.

Avvalroq e’lon qilingan nafaqalar miqdorini oshirish rejalari amaliyotga tatbiq etilib, to‘lovlar yangilangan tariflar bo‘yicha hisoblanmoqda.

Kam ta’minlangan oilalarga beriladigan bolalar nafaqasi yosh va farzandlar soniga qarab quyidagicha belgilandi:

• 3 yoshgacha bo‘lgan bir nafar kichik farzand uchun — 386 000 so‘m
• 3 yoshdan 18 yoshgacha bo‘lgan bir nafar farzand uchun — 295 000 so‘m
• Oilaning ikkinchi farzandi uchun qo‘shimcha — 177 000 so‘m
• Oilaning uchinchi va undan keyingi har bir farzandi uchun qo‘shimcha — 118 000 so‘m

Pensiya va davlat ta’minotiga ega bo‘lmagan fuqarolar uchun quyidagi to‘lov miqdorlari joriy etildi:

• Moddiy yordam — 450 000 so‘m
• Yoshga doir nafaqa — 878 000 so‘m
• Nogironligi bo‘lgan bolaning onasiga yoshga doir nafaqa — 878 000 so‘m
• Boquvchisini yo‘qotganlik nafaqasi — 878 000 so‘m
• Parvarishlash nafaqasi — 878 000 so‘m

Nogironligi bo‘lgan shaxslarga to‘lanadigan oylik to‘lovlar ham oshirildi:

• I guruh nogironlik nafaqasi — 1 209 000 so‘m
• II guruh nogironlik nafaqasi — 1 083 000 so‘m
• Nogironligi bo‘lgan 18 yoshgacha bolalar nafaqasi — 1 083 000 so‘m
• Yakka yolg‘izlarga moddiy yordam — 715 000 so‘m
• 100 yosh va undan oshgan fuqarolarga qo‘shimcha nafaqa — 504 000 so‘m
• Kommunal to‘lovlar o‘rniga kompensatsiya — 226 800 so‘m
• Dafn marosimi nafaqasi — 2 016 000 so‘m

Kuz oyidan e’tiboran yana ikki turdagi ijtimoiy to‘lov miqdori yangilanadi:

• Bola tug‘ilganda beriladigan bir martalik nafaqa (suyunchi puli) — 956 800 so‘m
• Jazo muddatini o‘tab ozod qilingan shaxslarga moddiy yordam — 2 640 000 so‘m

Bolalar nafaqasi va moddiy yordam tayinlash “Ijtimoiy reestr” axborot tizimi orqali avtomatlashtirilgan holda amalga oshiriladi. Murojaat qiluvchi oilaning har bir a’zosiga to‘g‘ri keladigan daromad miqdori belgilangan mezonlardan oshmasligi kerak.

Nafaqa tayinlashda oila tarkibi, biriktirilgan mol-mulk va rasmiy daromadlar elektron bazalar integratsiyasi orqali inson omilisiz tekshiriladi. Nafaqa ajratilganligi haqidagi xabar fuqaroning telefon raqamiga SMS ko‘rinishida yuboriladi.

Ijtimoiy to‘lovlar har oyning belgilangan sanalarida tijorat banklarining plastık kartalariga o‘tkazib beriladi. Bank kartasiga ega bo‘lmagan yoki naqd shaklda olishni tanlagan fuqarolarga to‘lovlar Xalq bankining sayyor кассаlari tomonidan xonadonlariga yetkazib beriladi.

Aholiga to‘lovlar belgilangan muddatlarda avtomatlashtirilgan tizimlar orqali fuqarolarning bank kartalariga yoki naqd shaklda yetkazib beriladi.