Fan olimpiadasining tuman (shahar) bosqichida ballar teng kelgan taqdirda g'olibni aniqlash tartibi belgilandi. Har bir fan va sinf kesimida ishtirokchilar ballar ketma-ketligiga qarab saralanadi, ulardan uchtasi g'olib deb topiladi. Yakuniy qarorni hakamlar hay'atining xulosasi asosida tashkiliy qo'mita chiqaradi va g'oliblar uchinchi bosqichga tavsiya etiladi. Bu haqda Maktabgacha va maktab ta'limi vazirligi ma'lum qildi.
G'oliblarni aniqlash tartibi
Test natijalariga ko'ra har bir fan va sinf bo'yicha 1-, 2- va 3-o'rinlar ajratiladi. O'rinlar ballarning kamayib borish tartibida taqsimlanadi. G'oliblikka da'vogarlar orasida farq bo'lmasa, qo'shimcha mezonlar ishga tushadi. Bu tizim bir xil tayyorgarlik ko'rgan o'quvchilar orasidan eng munosibini ajratishga xizmat qiladi.
Teng ballda ustunlik qoidasi
Sovrinli o'rinlar uchun bir necha ishtirokchining bali bir xil chiqqan holatda testning qimmatli qismida ko'proq ball to'plagan o'quvchi ustunlikka ega bo'ladi. Avval uchinchi o'nlikdagi 21-30-savollar natijasi solishtiriladi. U yerda ham tenglik bo'lsa, ikkinchi o'nlikdagi 11-20-savollar tahlil qilinadi.
| Holat | Yechim |
|---|---|
| Umumiy ballar teng | 3-o'nlikdagi 21-30-savollarda ko'p ball to'plagan ustun bo'ladi |
| 3-o'nlikda ham teng | 2-o'nlikdagi 11-20-savollar natijasi solishtiriladi |
| Har bir qismda tenglik saqlansa | Hakamlar hay'ati qo'shimcha 3 ta ochiq test beradi va g'olib aniqlanadi |
Testlar maxfiyligi uchun javobgarlik
Barcha fanlardan test topshiriqlari vazirlik tomonidan tuziladi va maxfiyligi ta'minlangan holda joylarga yetkaziladi. Testlarni qog'ozga chiqarish, o'quvchilarning sinov topshirishi va hakamlarning ishlarni tekshirishi jarayonlarini ijtimoiy tarmoqlarda jonli namoyish etish topshirildi. Bu ishlarning shaffof, adolatli va barcha xavfsizlik choralari ko'rilgan holda tashkil etilishiga tuman (shahar) maktabgacha va maktab ta'limi bo'limlari mudirlari shaxsan mas'ul etib belgilandi. Eslatib o'tamiz, ikkinchi bosqich ishtirokchilarini ro'yxatga olish 10-oktabrda yakunlangani haqida avval xabar bergan edik.
