O’zbekistonlik o’quvchilar xalqaro olimpiadalarda 11 ta medal qo’lga kiritdi

Iyul oyi O'zbekiston o'quvchilari uchun medallarga boy bo'ldi. Germaniya, Litva va Xitoyda o'tkazilgan nufuzli xalqaro fan olimpiadalarida terma jamoamiz 1 ta oltin, 2 ta kumush va 8 ta bronza — jami 11 ta medal qo'lga kiritdi. Fan olimpiadalari markazi muvaffaqiyatli natijalar haqida xabar berdi. Xalqaro olimpiada g'oliblari uchun imtiyozlar haqida avvalroq batafsil yozilgandi.

Germaniya: nemis tilidan rekord

Xalqaro nemis tili olimpiadasi (IDO 2026) da O'zbekiston uchun tarixiy natija qayd etildi. Samarqand shahridagi 51-maktabning 9-sinf o'quvchisi Marjona Ibadullayeva A2 darajasida oltin medalni qo'lga kiritdi. Urganch shahridagi 19-AFCHO'M o'quvchisi Olimbek Baxtiyorov esa B1 darajasida bronza medalga sazovor bo'ldi.

Litva: biologiyadan ikki yillik tanaffusdan so'ng

37-Xalqaro biologiya olimpiadasi (IBO 2026) da O'zbekiston terma jamoasi ikki yillik tanaffusdan so'ng yana sovrindorlar safiga qaytdi. Navoiy shahridagi Prezident maktabi o'quvchilari Murodbek Latipov va Orzugul Muxtorova, shuningdek Jizzax shahridagi Prezident maktabi o'quvchisi Nursulton Ashiraliyev bronza medallarini qo'lga kiritdi.

Xitoy: iqtisod va matematika

Shenjenda bo'lib o'tgan Xalqaro iqtisod olimpiadasida (IEO 2026) Qarshi shahridagi Prezident maktabi o'quvchisi Asliddin Boynazarov hamda Nukus shahridagi Prezident maktabi o'quvchisi Nurlybay Alimjanov bronza medallarini qo'lga kiritdi.

Eng ko'p medal esa 67-Xalqaro matematika olimpiadasi (IMO 2026) da olindi. 119 mamlakatdan 685 nafar o'quvchi ishtirok etgan musobaqada O'zbekiston terma jamoasi 2 ta kumush va 3 ta bronza bilan qaytdi. Kumush medallar Elshod O'ralov va Dostonbek Rahmonqulovga, bronza medallar Azizbek Mamajonov, Elbek Zohidjonov va Rasulbek G'afforovga nasib etdi.

G'oliblar qanday rag'batlantiriladi

Prezidentning 2024-yil 30-sentabrdagi qaroriga muvofiq, xalqaro olimpiada g'oliblari va ularning o'qituvchilari davlat tomonidan pul mukofotlari bilan rag'batlantiriladi:

• Oltin medal — 824 million so'm (o'qituvchiga 144,2 mln);
• Kumush medal — 618 million so'm (o'qituvchiga 103 mln);
• Bronza medal — 412 million so'm (o'qituvchiga 61,8 mln).

Bundan tashqari, g'olib o'quvchilar davlat OTMlariga o'z yo'nalishi bo'yicha qo'shimcha davlat granti asosida imtihonsiz qabul qilinadi. Ularni tayyorlagan o'qituvchilarning malaka toifasi bir pog'onaga oshiriladi, oliy toifali pedagoglarga esa bazaviy stavkaning 100 foizi miqdorida har oylik ustama to'lanadi.

InfoEdu.uz jurnalistlari yurtimiz yoshlarining xalqaro maydondagi barcha yutuqlarini muntazam yoritib boradi.