Nogironligi bor talabgorlar: Chet tilidan imtihon o‘tkazildi

Bilimni baholash agentligi tomonidan 2026-yil 10-aprel kuni ko‘zi ojiz va yozish imkoniyati cheklangan talabgorlar uchun chet tilini bilish darajasini aniqlash bo‘yicha malaka imtihonlari o‘tkazildi. Ushbu imtihonlar maxsus dastur asosida kompyuterda tashkil qilindi. Imtihon jarayonida har bir talabgorga yordamchi (assistent) biriktirildi. Bu nogironligi bor shaxslarning imtihonda teng ishtirok etishi va bilimlarini to‘liq namoyon qila olishi uchun zarur shart-sharoit yaratish maqsadida amalga oshirildi. Imtihon tuzilishi talabgorlarning imkoniyatlaridan kelib chiqib tashkil etildi: — ko‘zi ojiz talabgorlar uchun “tinglab tushunish” va “gapirish” bo‘limlaridan; — yozish imkoniyati cheklangan talabgorlar uchun “tinglab tushunish”, “o‘qish” va “gapirish” bo‘limlaridan iborat bo‘ldi. Malaka imtihonlarida respublika bo‘ylab jami 119 nafar talabgor ishtirok etdi. Eslatib o‘tamiz, avvalroq I va II guruh ko‘rish bo‘yicha nogironligi bor shaxslar uchun chet tilini bilish darajasini aniqlash imtihonlarining 50 foiz to‘lovi davlat tomonidan qoplanishi belgilangan edi. Shuningdek, oliy ta’lim muassasalariga kirishda nogironligi bo‘lgan shaxslar uchun qo‘shimcha kvotalar ajratiladi va test jarayonlarida ishtirokini ta’minlash uchun barcha sharoitlar yaratiladi.