Kira olmagan abituriyentlar vakant o‘rinlarga kirishi mumkin

Mandat natijalari chiqdi — kimdir talaba bo‘ldi, kimdir esa kira olmadi. Kirmaganlar uchun ham imkoniyat bor: endi vakant (bo‘sh) o‘rinlar qolgan yo‘nalishlarga kirish mumkin. Bu imkoniyat Hukumat qarori bilan rasman tasdiqlandi.

Bu imkoniyat kimga beriladi?

Kirish imtihonlarida ishtirok etib, minimal ball to‘plagan, biroq talabalikka tavsiya etilmagan abituriyentlar vakant o‘rinlar qolgan yo‘nalishlarda tanlovda qatnashishi mumkin. Ya’ni ballingiz minimal chegaradan past bo‘lmasa, hali hammasi yo‘qolgani yo‘q — o‘qishga kirish imkoniyati saqlanib qoladi.

Eslatib o‘tamiz, vakant o‘rinlarga qabul — o‘tgan o‘quv yilidan boshlab joriy etilgan tartib. Odatda vakant o‘rinlar mandat natijalari e‘lon qilinganidan bir hafta o‘tib e‘lon qilinadi, shuning uchun shu kunlarda e‘lon chiqishi kutiladi.

Tartib “Oliy ta’lim tashkilotlariga o‘qishga qabul qilish jarayonlarini tartibga soluvchi normativ-huquqiy hujjatlarni tasdiqlash to‘g‘risida”gi 578-sonli qarorga kiritilgan o‘zgartirishlar bilan belgilangan — to‘liq matn 578-sonli qarorga kiritilgan o‘zgartirishlar da mavjud.

Jarayon qanday ishlaydi?

Hammasi uch bosqichda amalga oshiriladi:

• imtihon natijalari e’lon qilingandan bir hafta o‘tib, siz topshirgan fanlar majmuasi va ta’lim tili mos keladigan vakant yo‘nalishlarga bir hafta muddatda ro’yxatdan o‘tiladi;
• abituriyentlar to‘plagan ballari ketma-ketligiga qat’iy rioya qilingan holda bo‘sh o‘rinlarga bazaviy to’lov-kontrakt asosida qabul qilinadi — ya’ni eng yuqori ball to‘plaganlar birinchi navbatda o‘rin egallaydi;
• Bilimni baholash agentligi shakllantirgan qaydnomalar oliy ta’lim tashkilotlariga buyruq rasmiylashtirish uchun asos bo‘ladi.

Yana nima o‘zgardi?

Qarorning 74-bandiga ham o‘zgartirish kiritilgan. Avval ayrim qarorlar Davlat komissiyasi hisobidan qabul qilingan bo‘lsa, endilikda bu vakolat oliy ta’lim tashkiloti rektori (direktori) hisobiga o‘tkazildi. Ya’ni mas’uliyat va qaror qabul qilish bevosita OTM rahbari zimmasiga yuklatildi.

Avvalroq vakant o‘rinlar uchun qo‘shimcha tanlov haqida yozgan edik. InfoEdu.uz orqali ta’limga oid eng muhim yangiliklarni muntazam kuzatib boring.