30-sentabr kuni “Yangi O‘zbekiston” universitetida Prezident Shavkat Mirziyoyev ustoz va murabbiylar bilan uchrashdi. Uchrashuvda oliy ta’lim sifati, zamonaviy o‘quv adabiyotlarini yaratish va universitetlar mustaqilligi muhokama qilindi. Bu haqda Prezident matbuot kotibi Sherzod Asadov o‘z xabarida batafsil ma’lumot berdi.
Bugungi asosiy yangilik shu — davlat oliygohlarining kuzatuv kengashlari tarkibi yangilanadi va ular xorijiy adabiyotlar mualliflari bilan hamkorlikda har yili kamida 50 ta darslik yaratadi. Prezident rektorlar oldiga darsliklar mazmuni bugungi kun talabiga qanchalik mos degan savolni qo‘yib, hozircha ijobiy javob yo‘qligini ta’kidladi.
Kuzatuv kengashlarida xususiy sektor vakillari ko‘payadi
Bundan buyon davlat universitetlari kuzatuv kengashlari a’zolarining uchdan ikki qismi xususiy sektor va xorijiy oliygohlar vakillaridan iborat bo‘ladi. Kengash a’zolari va jalb etilgan ekspertlarga haq to‘lash yo‘lga qo‘yiladi. Bu — oliygoh boshqaruviga amaliyotchi va ish beruvchilarni olib kirish degani.
Kuzatuv kengashlari mutaxassisliklar va o‘quv dasturlarini mehnat bozori talabiga moslab, to‘liq qayta ko‘rib chiqadi. Ya’ni dasturlar endi faqat akademik doira emas, ish beruvchi talabi asosida shakllanadi. Xorijiy adabiyotlar mualliflari bilan hamkorlikda esa har yili kamida 50 ta darslik yaratiladi.
Muhandislik va tibbiyot oliygohlariga alohida topshiriq
Yigirma ikkita muhandislik oliygohi birlashib mualliflar jamoalarini tuzadi, xorijlik hamkorlar bilan ishlaydi hamda har yili 25–30 ta yangi o‘quv adabiyotini yaratadi yoki ilg‘or kitoblarni tarjima qilib moslashtiradi. Fanlar bo‘yicha takrorlanishni kamaytirish ham shu birlashishning maqsadlaridan biri.
O‘n bitta tibbiyot oliygohi transplantologiya, robot xirurgiyasi, kam invaziv jarrohlik va biomuhandislik yo‘nalishlari uchun zamonaviy adabiyotlar tayyorlashni kechiktirmasligi kerak. Prezident oliygohlarda ta’lim sifati va mutaxassislar malakasida hali keskin o‘zgarish zarurligini aytdi.
Darsliklar mazmuniga jiddiy talab qo‘yildi
Prezident yangi avlod darsliklarini yaratish ishlari 2018-yilda boshlanganini esladi. Unga tajribali mutaxassislar, mualliflar, olimlar, pedagoglar va xususiy kompaniyalar jalb qilindi, Finlyandiya va Singapur kabi davlatlarning tajribasi o‘rganildi. Faqat shu yilning o‘zida 324 ta darslik yangilandi, ularni tayyorlashda 400 nafardan ziyod mutaxassis mehnat qildi.
Shu bilan birga, darsliklardagi xatolar masalasi ham kun tartibida turibdi. Avvalroq darsliklarda 1 ming 257 ta xato topilgani va yangi nusxalar 2027-yilgacha tayyorlanishi ma’lum qilingandi.
Rektorlar sifat uchun shaxsan javob beradi
Prezident rektorlar oliy ta’lim sifati, mazmuni va natijasi uchun shaxsan mas’uliyat olishi shartligini ta’kidladi. Bitiruv ishlari va dissertatsiyalar iqtisodiyot tarmoqlaridagi amaliy muammolar yechimiga yo‘naltiriladi. Professor-o‘qituvchilar va iqtidorli talabalar ishtirokida kreativ klublar tuzilib, xususiy sektor ehtiyojiga mos ilmiy ishlanmalar ko‘paytiriladi.
Uchrashuvda oliy ta’lim qamrovi bo‘yicha raqamlar ham aytildi: talabalar soni 1 million 600 mingga yetgan, 7 ta oliygoh 17 ta fan bo‘yicha nufuzli xalqaro reytinglarga kirgan, universitetlarga akademik, tashkiliy va moliyaviy mustaqillik berilgan. Prezident bu mustaqillikdan samarali foydalanishni talab qildi.
