50 foizlik ustama: Kimlar uchun mo‘ljallangan?
2025-yil 1-yanvardan boshlab umumta’lim maktablarida ona tili va adabiyot, hamda tarix fanlaridan dars beruvchi, tegishli milliy sertifikatga ega o‘qituvchilar uchun 50 foizlik ustama to‘lanishi belgilandi. Biroq, ushbu qaror rus sinflarida o‘zbek tili fanidan dars beruvchi pedagoglar o‘rtasida jiddiy e’tirozlarga sabab bo‘ldi.
O‘qituvchilar nima uchun norozi?
O‘zbek tili o‘qituvchilari mazkur tartibni adolatsiz deb hisoblashmoqda. Ularning ta’kidlashicha, ular ham davlat tili rivojiga xizmat qiladi va milliy sertifikat olish jarayonida boshqa fan o‘qituvchilari bilan bir xil murakkab talablarni bajarishadi. Pedagoglar ushbu holat bo‘yicha pedagog kadrlar attestatsiyasi va ustamalar tizimini qayta ko‘rib chiqishni taklif etishmoqda.
Vazirlikning rasmiy tushuntirishi
Maktabgacha va maktab ta’limi vazirligi 50 foizlik ustama faqat ona tili va adabiyot faniga tegishli ekanligini ta’kidladi. Unga ko‘ra, ustama quyidagi fanlar uchun amal qiladi:
- Ta’lim o‘zbek tilida olib boriladigan maktablarda o‘zbek tili va adabiyoti;
- Ta’lim rus tilida olib boriladigan maktablarda rus tili va adabiyoti;
- Ta’lim qoraqalpoq tilida olib boriladigan maktablarda qoraqalpoq tili va adabiyoti.
Rus sinflaridagi o‘zbek tili o‘qituvchilari uchun esa 20 foizlik ustama saqlanib qolishi ma’lum qilindi. Mutaxassislar vaziyatni yumshatish uchun o‘zbek tili uchun alohida milliy sertifikat joriy etish zaruriyatini ilgari surishmoqda.
Izohlar (0)
Izoh yozish uchun tizimga kiring.