2026/2027-o’quv yili bakalavriat va magistratura qabul parametrlari tasdiqlandi

Davlat komissiyasi tomonidan 2026/2027-o'quv yili uchun bakalavriat va magistratura bo'yicha umumiy qabul parametrlari hamda davlat granti kvotalarining aniq taqsimoti tasdiqlandi.

Eng muhim jihatlardan biri — axborot texnologiyalari va sun'iy intellekt yo'nalishlari uchun davlat granti kvotalarining 35 foizga oshirilishi bo'ldi. Bu qaror mamlakatda raqamli iqtisodiyot va innovatsion taraqqiyotga bo'lgan e'tiborning yorqin ifodasidir.

Qo'shimcha grant kvotalari

Davlat tomonidan ayrim toifadagi fuqarolar uchun maxsus imtiyozli kvotalar ajratilgan:

• Nogironligi bo'lgan shaxslar uchun qo'shimcha 2 foizlik davlat granti;
• Yetim va ota-ona qaramog'idan mahrum bo'lgan bolalar uchun qo'shimcha 1 foizlik grant;
• Ichki ishlar organlari xodimlari farzandlari uchun qo'shimcha 5 foizlik grant;
• Muddatli harbiy xizmatni o'tab, tavsiyanomaga ega fuqarolar uchun alohida 5 foizlik qabul ko'rsatkichlari;
• Bojxona organlari xodimlari farzandlari uchun qo'shimcha 2 foizlik grant;
• "Ijtimoiy reyestr"ga kiritilgan oilalar farzandlari uchun qo'shimcha 10 foizlik grant kvotasi.

Xotin-qizlar va boshqa imtiyozli kvotalar

• Xotin-qizlar uchun kunduzgi ta'limga qo'shimcha 4 000 ta davlat granti;
• 5 yillik mehnat stajiga ega xotin-qizlar uchun 2 500 ta alohida to'lov-kontrakt o'rni;
• Xorijdagi yosh vatandoshlar uchun 30 ta davlat granti;
• Qirg'iziston, Qozog'iston, Tojikiston va Mo'g'uliston fuqarolari uchun davlat granti asosidagi alohida qabul ko'rsatkichlari.

Maqsadli qabul va boshqa yo'nalishlar

Tasdiqlangan hujjatda maktabgacha ta'lim pedagoglari uchun dual ta'lim asosidagi qabul, oliy toifali maktab o'qituvchilari uchun pedagogika magistraturasiga masofaviy maqsadli qabul, shuningdek Green University uchun 100 ta qabul parametri alohida belgilab o'tilgan. Ta'lim sohasidagi eng dolzarb yangiliklar va rasmiy e'lonlarni InfoEdu.uz saytida muntazam kuzatib borishingiz mumkin.