O'zbekistonda oliy ta'lim muassasalarida tahsil olayotgan talabalar soni 1 million 606 ming 872 nafarga yetdi. Bu ko'rsatkich o'tgan o'quv yilidagidan sezilarli darajada yuqori.
Yangi ma'lumotlarga ko'ra, mamlakat bo'ylab oliygohlarda o'qiyotgan yoshlar soni 1,6 milliondan oshib ketgan. Bu O'zbekiston ta'lim tizimida so'nggi yillarda kuzatilayotgan jadal o'sishning navbatdagi tasdig'idir.
Raqamlar nima deydi?
Statistikaga nazar tashlasak, talabalar soni qanday tezlikda o'sib borayotganini aniq ko'rish mumkin. Eslatib o'tamiz, ta'lim xizmatlari bozori hajmi 14,5 trillion so'mga yetgan edi.
- 2015/2016 o'quv yili — 264,3 ming talaba
- 2019/2020 o'quv yili — 441 ming talaba
- 2021/2022 o'quv yili — 808,4 ming talaba
- 2023/2024 o'quv yili — 1 314,5 ming talaba
- 2025/2026 o'quv yili boshida — 1 535 ming talaba
- Hozirgi kunda — 1 606 872 talaba
Ya'ni so'nggi 10 yil ichida oliy ta'limga qamrab olish darajasi 9 foizdan 42 foizgacha oshgan va talabalar soni qariyb 6 barobarga ko'paygan.
Xususiy oliygohlar hissasi
Ayniqsa, xususiy universitetlar talabalar sonining o'sishiga katta hissa qo'shmoqda. Xususiy OTMlarda 620 mingdan ortiq talaba tahsil olmoqda — bu umumiy talabalarning salmoqli qismini tashkil etadi. Mamlakatda 215 ta oliy ta'lim muassasasi faoliyat yuritmoqda, shundan 97 tasi nodavlat.
Qayerda ko'p talaba?
Talabalarning deyarli 38 foizi — 579 ming nafari — Toshkent shahrida to'plangan. Hududlar orasida Buxoro (117,7 ming), Qashqadaryo (111,6 ming) va Toshkent viloyati (101,5 ming) yetakchilik qilmoqda.
Shuningdek, qabul 2026 jarayoni davom etayotganini hisobga olsak, talabalar soni yil oxiriga borib yanada oshishi kutilmoqda.
Reklama
Izohlar (0)
Izoh yozish uchun tizimga kiring.