Ballingiz yetmadi. Qabul komissiyasi yakunlari e'lon qilindi, lekin siz o'zingiz kutgan yo'nalishda ro'yxatda ko'rinmayapsiz. Vahima qilishga hojat yo'q — super-kontrakt aynan shunday vaziyatlar uchun mavjud. Ammo shoshilinch qarorga kelishdan oldin, bir narsani aniq bilib olish kerak: 2026/2027-o'quv yili uchun super-kontrakt narxi va tartiblari hozircha tasdiqlangani yo'q. Tasdiqlangach, birinchi bo'lib InfoEdu.uz orqali xabar beramiz.
Shunga qaramay, o'tgan yilgi tajriba va mavjud qoidalar asosida sizga kerakli bo'ladigan deyarli barcha ma'lumotni tayyorlab qo'ydik. Chunki eng yomoni — noto'g'ri ma'lumotga ishonib, adashib qolish. Mana, eng ko'p beriladigan savollar va ularning aniq javoblari.
Balingiz 4 ballgacha yetmagan bo'lsa, qancha to'laysiz?
Super-kontrakt miqdori sizning o'tish baliga qanchalik yaqinlashganingizga bog'liq. Yetmagan ballar diapazoni qancha tor bo'lsa, koeffitsiyent shuncha past bo'ladi:
- O'tish baliga 1,05 ballgacha yetmaganlar — bazaviy kontraktning 1,5 barobari (masalan, kontrakt 10 mln so'm bo'lsa — 15 mln so'm to'laysiz);
- 1,06–2,05 ball yetmaganlar — 2 barobari;
- 2,06–3,05 ball yetmaganlar — 2,5 barobari;
- 3,06–4,05 ball yetmaganlar — 3 barobari.
Aynan shu yerda ko'pchilik adashadigan bitta muhim nuqta bor. "4,05 ballgacha" degan raqamni ko'rib, ba'zilar buni "4,5" deb o'qiydi. Aslida 4,05 (to'rt-u yuzdan nol besh) bilan 4,5 (to'rt yarim) orasida katta farq bor. Agar sizga 4,1 ball yetmagan bo'lsa — siz yuqoridagi 4 ballik shkalaga tushmaysiz. Bunday holatda (agar balingiz 56,7 dan yuqori bo'lsa) sizga 8, 10, 12, 15, 17 yoki 25 baravar miqdorida super-kontrakt taklif qilinadi. Bu to'lov miqdori yetmagan balingizga qarab jiddiy o'zgarishini anglatadi.
To'lov qachon va qanday amalga oshiriladi?
Yana bir keng tarqalgan tushunmovchilik — birinchi yili ham super-kontrakt, ham oddiy kontrakt to'lanadi degan noto'g'ri fikr. Aslida birinchi yili faqat super-kontrakt summasi to'lanadi. Ikkinchi yildan boshlab esa aksincha — faqat oddiy kontraktga o'tasiz, super-kontrakt to'lanmaydi.
Ariza topshirish: qachon, qayerda va kim birinchi?
Hozircha super-kontrakt uchun arizalar qabul qilinmayapti, shoshilib OTMga yugurib borishingiz shart emas. Ariza sentyabr oyida, o'qishlar boshlangach onlayn qabul qilinadi. Uyingizdan chiqmagan holda internet orqali topshirasiz — OTMga kelish, navbat kutish yoki kimdandir iltimos qilish kerak emas.
Yana bir muhim detal: kim birinchi ariza bersa, o'sha birinchi qabul qilinadi degan qoida mutlaqo yo'q. Talabgorlar to'plangan ballga qarab tartibga solinadi — avval yuqori ball to'plaganlar imkoniyatga ega bo'ladi.
Boshqa yo'nalishga o'qishga kirgan bo'lsangiz-chi?
Bu — eng nozik masala. Misol uchun, birinchi va ikkinchi yo'nalishlaringizga bal yetmadi, lekin uchinchi yo'nalishingizga kirdingiz. Endi o'qishni istamay, birinchi yo'nalishda super-kontraktda o'qimoqchisiz. Afsuski, joriy yilgi tartib hali ochiq.
O'tgan yili bunday holatda faqat birinchi yo'nalishda super-kontraktda o'qishga ruxsat berilgandi. Ya'ni 3-yo'nalishga kirgan abituriyent 2-yo'nalishda super-kontraktda o'qiy olmasdi. Bu yilgi tartib tasdiqlangach, alohida xabar beramiz. O'qishga umuman kira olmaganlar uchun esa o'tgan yili istalgan beshta yo'nalishdan birida super-kontrakt tanlash imkoni berilgandi.
Ta'lim krediti olsa bo'ladimi?
Super-kontraktning o'zi uchun ta'lim krediti berilmaydi. Ayrim banklar tijoriy shartlarda oddiy kredit taklif qilishi mumkin, ammo bu standart ta'lim krediti emas. Yaxshi xabar shundaki, 2-kursdan oddiy kontrakt to'lashga o'tganingizdan so'ng, ta'lim kreditiga bemalol ariza topshirishingiz mumkin. Esda tuting: ta'lim krediti faqat kunduzgi ta'lim shakliga beriladi.
Yangi tartiblar tasdiqlangach, InfoEdu.uz orqali birinchilardan bo'lib xabar beramiz. Ta'limga oid boshqa muhim yangiliklarni ham saytimizda muntazam kuzatib boring.
Reklama
Izohlar (0)
Izoh yozish uchun tizimga kiring.