Yangi texnologiya yoki ilmiy ishlanmani biznesga aylantirmoqchi bo‘lgan tadbirkor uchun eng qiyin bosqich — g‘oyani ishlab chiqarishga yetkazish. Bunda zarur bino, huquqiy yordam va moliyalashtirish manbasini topish ko‘p vaqt oladi. Vazirlar Mahkamasining 9-oktabr kuni qabul qilingan 553-son qarori bilan aynan shu masalani yechishga qaratilgan innovatsiya va startap loyihalar parklarini tashkil etish tartibi belgilandi.
Hujjatga ko‘ra, bunday parklar hududlarda innovatsion faoliyatni rivojlantirish, yangi qulay shart-sharoitlar yaratish, innovatsion mahsulotlar ishlab chiqarish va xizmatlar ko‘rsatishni yo‘lga qo‘yish maqsadida tashkil etiladi.
Parklar faoliyatining asosiy yo‘nalishlari
Parkda joylashgan tadbirkorlik subyektlariga mahsulot ishlab chiqarish uchun sharoit yaratish bilan birga, qator xizmatlar ko‘rsatiladi. Ularning yo‘nalishlari qarorda aniq belgilab qo‘yilgan:
- Moliyaviy, huquqiy va marketing xizmatlari;
- Biznes-inkubator va akselerator dasturlari;
- Innovatsion mahsulotlarni sertifikatlash va davlat ro‘yxatidan o‘tkazish;
- Intellektual mulkni huquqiy himoya qilish, litsenziyalash va franchayzing;
- Texnologiyalar transferi va xalqaro bozorlarga chiqishga ko‘maklashish.
Shuningdek, parklar mahalliy va xorijiy kompaniyalar bilan hamkorlikni rivojlantirish hamda yangi texnologiyalarni joriy etishga yordam beradi.
Ijara shartlari va tanlov tartibi
Tadbirkorlik subyektlari parklarga tanlov asosida joylashtiriladi. Tanlovda g‘olib bo‘lganlar bilan dastlab uch yilgacha muddatga ijara shartnomasi tuziladi. Bu muddat tadbirkor uchun ishlab chiqarishni yo‘lga qo‘yish va mahsulotni bozorga chiqarish uchun boshlang‘ich davr hisoblanadi.
Muddat yakunlangach, tadbirkorning faoliyati va erishgan natijalari baholanadi. Baholash natijasiga ko‘ra ijara muddati uzaytirilishi mumkin — ya’ni parkda qolish uchun asos amalda ko‘rsatilgan natija bo‘ladi.
Boshqaruv va moliyalashtirish manbalari
Innovatsiya va startap loyihalar parklarini tashkil etish hamda ularning faoliyatini muvofiqlashtirish Ta’lim va ilm-fan vazirligi huzuridagi Innovatsion rivojlanish agentligi tomonidan amalga oshiriladi. Parklar agentlik direktorining buyrug‘i bilan tashkil qilinadi, ularning direktorlari esa tegishli tuman yoki shahar hokimlarining tavsiyasiga asosan tayinlanadi.
Parklar uchun zarur bino va infratuzilma mahalliy hokimliklar tomonidan ajratiladi. Faoliyatni moliyalashtirishda mahalliy budjet, Innovatsion rivojlanish agentligi mablag‘lari, xalqaro moliya institutlari va donor tashkilotlarning grantlaridan foydalaniladi. Shuningdek, qonunchilikda taqiqlanmagan boshqa manbalar ham jalb qilinishi mumkin.
Sirdaryoda ilk park uchun ajratilgan hudud
Qaror bilan Sirdaryo viloyatining Sirdaryo tumanidagi sobiq mexanizatsiyalashgan texnika saroyining 1,2 gektar yer maydonida innovatsiyalar parkini joylashtirish belgilangan. Bu — yangi tuzilmaning amalda qayerda paydo bo‘lishini ko‘rsatuvchi birinchi aniq manzil.
Startaplarni qo‘llab-quvvatlashga oid mavzular saytimizda avval ham yoritilgan. Jumladan, startap loyihalarini tanlash, saralash va moliyalashtirish tizimini takomillashtirishga qaratilgan qaror loyihasi muhokamalar portaliga joylashtirilgani haqida ham yozgan edik.
