Sertifikatlarning amal qilish muddati qanday hisoblanadi?
Oliy ta’lim muassasalariga kirish imtihonlarida milliy yoki xalqaro sertifikatlar (IELTS, CEFR, TOPIC va boshqalar) abituriyentga maksimal ball berish yoki imtihondan ozod etish imkonini beradi. Biroq ushbu imtiyozdan foydalanish uchun hujjatning yaroqlilik muddati eng muhim mezon hisoblanadi.
Sertifikat muddatini inobatga olishda milliy va xalqaro hujjatlar uchun ikkita alohida qoida amal qiladi:
Reklama
- Milliy sertifikatlar: Amal qilish muddati abituriyentning OTM qabuliga ro‘yxatdan o‘tgan sanasiga qarab belgilanadi. Masalan, sertifikatingizning muddati 20-iyunda tugasa va siz qabul tizimidan 20-iyungacha ro‘yxatdan o‘tib ulgursangiz, sertifikat to‘liq inobatga olinadi. 21-iyundan boshlab esa o‘z kuchini yo‘qotadi.
- Xalqaro sertifikatlar: Bunda hujjatning tizimga yuklangan sanasi mezon qilib olinadi. Agar xalqaro sertifikat muddati 20-iyunda yakunlansa va abituriyent uni 20-iyun kuni shaxsiy kabinetiga joylasa, u qabul qilinadi. 21-iyun yoki undan keyingi sanalarda yuklangan sertifikatlar qabul jarayoniga o‘tmaydi.
Milliy va xalqaro sertifikatlarni kiritishdagi farqlar
Abituriyentlar hujjat topshirish jarayonida sertifikatlarni qayerdan tekshirish yoki qanday kiritish kerakligi borasida chalkashliklarga yo‘l qo‘ymasliklari lozim.
- Avtomatik aks etish (Milliy): Vazirlik va Bilimni baholash agentligi bazasi o‘zaro integratsiya qilingani sababli, milliy sertifikatlar abituriyentning shaxsiy kabinetida avtomatik ravishda paydo bo‘ladi. Ularni qo‘lda kiritish talab etilmaydi.
- Qo‘lda yuklash (Xalqaro): Xalqaro sertifikatlarga ega abituriyentlar my.uzbmb.uz yagona elektron platformasiga kirib, sertifikat ma’lumotlari va seriya raqamlarini o‘zlari mustaqil ravishca kiritishlari shart.
Tekshirish jarayoni va maxsus statuslar ma’nosi
Dasturga kiritilgan barcha hujjatlarning haqiqiyligi Bilimni baholash agentligi mutaxassislari tomonidan sinchiklab tekshiriladi. Tekshirish natijasiga ko‘ra, abituriyent kabinetida quyidagi 3 ta statusdan biri aks etadi:
| Status nomi | Ma’nosi va keyingi qadamlar |
| 🟡 TEKSHIRILMOQDA | Sertifikat tizimga muvaffaqiyatli kiritilgan va hozirda agentlik mas’ullari tomonidan haqiqiyligi o‘rganilmoqda. |
| 🟢 TASDIQLANDI | Hujjatning to‘g‘riligi va imtiyoz talablariga mosligi tasdiqlandi. Ballar test sinovlarida avtomatik hisobga olinadi. |
| 🔴 TASDIQLANMADI | Sertifikat haqiqiy emas deb topilgan yoki imtiyoz shartlariga mos kelmagan. Agar ma’lumotlar shunchaki noto‘g‘ri kiritilgan bo‘lsa, abituriyentda xatolikni tuzatib, sertifikatni qayta yuklash imkoniyati bo‘ladi. |
Izohlar (0)
Izoh yozish uchun tizimga kiring.