Ruxsatnomada nega test vaqti 6:30 va 13:30 ko‘rsatilgan?

Ko‘plab abituriyentlarni qiziqtirayotgan savollardan biri — nega ruxsatnomalarda test vaqti 6:30 hamda 13:30 deb ko‘rsatilgan?

Aslida, joriy yilda ham test sinovlari ikki smenada o‘tkaziladi. Birinchi smena soat 08:00, ikkinchi smena esa soat 15:00 da boshlanadi.

Ruxsatnomadagi 6:30 va 13:30 nimani anglatadi?

Ruxsatnomada ko‘rsatilgan 06:30 va 13:30 test boshlanish vaqti emas. Bu — abituriyentlar test o‘tkaziladigan hududga yetib kelishi kerak bo‘lgan vaqt hisoblanadi.

Bunga sabab, test sinovlari boshlanishidan oldin barcha abituriyentlar bir necha bosqichli tekshiruvlardan o‘tadi. Ushbu jarayon ma'lum vaqt talab qilgani uchun test markaziga oldindan kelish tavsiya etiladi.

Kechikkan abituriyent testga kiritiladimi?

Yo‘q. Test sinoviga belgilangan vaqtdan kechikib kelgan abituriyentlar imtihonga kiritilmaydi.

Shuningdek, kechikkanlar uchun boshqa kunda test topshirish imkoniyati ham berilmaydi. Shu sababli test markaziga kamida 1 soat oldin yetib kelish tavsiya etiladi.

InfoEdu.uz kuzatuviga ko‘ra, har yili ko‘plab abituriyentlar aynan kechikib kelgani sababli test sinovlarida ishtirok eta olmay qoladi. Bunday holatlarning oldini olish uchun ruxsatnomada test boshlanishidan 1,5 soat oldingi vaqt ko‘rsatiladi.

Test sinoviga qanday hujjatlar bilan borish kerak?

Test sinoviga kirishda quyidagi hujjatlar majburiy hisoblanadi:

• pasport yoki ID-karta;
• qog‘ozda chop etilgan abituriyent ruxsatnomasi.

Ruxsatnoma rangli bo‘lishi shart emas, uni oq-qora formatda ham chop etish mumkin.