Perevod haqida eng ko’p beriladigan 4 ta savolga aniq javoblar

Perevod mavzusida talabalarni qiynayotgan savollar ko'p. Muddatlar qachon, qaysi fanlardan imtihon bo'ladi, xususiy OTM transkript bermasa nima qilish kerak — shularning barchasiga aniq javob beramiz. Qishki perevod natijalari haqida avvalroq batafsil yozilgandi. Bu safar eng ko'p beriladigan 4 ta savolga to'xtalamiz.

1. Perevod qachongacha davom etadi

O'qishni ko'chirish ikki mavsumda amalga oshiriladi:

• Kuzgi semestr uchun — 15-iyuldan 5-avgustgacha (5-avgust kuni ham);
• Bahorgi semestr uchun — 10-yanvardan 20-yanvargacha (20-yanvar kuni ham).

Barcha arizalar elektron platforma orqali topshiriladi — qog'oz yig'ib yurish shart emas. Xususiy OTMdan xususiy OTMga o'tish ham endi transfer.edu.uz yoki uzbmb.uz saytlari orqali amalga oshiriladi.

2. Xususiy OTM transkript bermasa nima qilish kerak

Bu — eng ko'p uchraydigan muammolardan biri. Talaba xususiy OTMdan boshqa joyga ko'chmoqchi, lekin o'zi o'qiyotgan universitet transkript berishdan bosh tortmoqda. Xususiy OTMning transkript bermaslikka haqqi yo'q. Agar bunday holatga duch kelsangiz:

• Oliy ta'lim, fan va innovatsiyalar vazirligiga murojaat qiling;
• Yoki tegishli huquqni muhofaza qilish organlariga shikoyat qiling.

Transkript — bu sizning qonuniy huquqingiz. Universitet uni berishdan bosh torta olmaydi.

3. Xususiydan xususiyga ham portal orqali ariza kerakmi

Ha, kerak. Ilgari xususiydan xususiyga o'tish boshqacha tartibda bo'lgan bo'lsa, endilikda barcha turdagi perevod arizalari transfer.edu.uz yoki uzbmb.uz portallari orqali topshiriladi. Yagona tizim — yagona tartib.

4. Perevodda qaysi fanlardan imtihon bo'ladi

Imtihon siz o'tmoqchi bo'lgan ta'lim yo'nalishiga kirish fanlari bo'yicha, o'qiydigan tilingizda o'tkaziladi. Masalan, tibbiyot yo'nalishiga o'tmoqchi bo'lsangiz — tibbiyotga kirish fanlaridan test yoki kasbiy (ijodiy) imtihon topshirasiz. Iqtisodiyotga o'tmoqchi bo'lsangiz — iqtisodiyotga kirish fanlaridan. Qisqasi, qaysi yo'nalishga o'tsangiz, o'sha yo'nalishning kirish imtihonlari sizni kutadi.

InfoEdu.uz jurnalistlari perevod jarayonidagi barcha muhim savollarga javob berishda davom etadi. 2-qismda yana savollarga javob beramiz.