Ona (o'zbek, rus, qoraqalpoq) tili va adabiyot fanlaridan 2026-yil aprel-may oylarida o'tkazilgan milliy sertifikat imtihoni natijalari e'lon qilindi. Endi talabgorlar o'z ballarini my.gov.uz portali orqali bilishlari mumkin.
Natijalar bosqichma-bosqich e'lon qilinayotgani sababli, agar natija hozircha ko'rinmasa, birozdan keyin qayta tekshirish tavsiya etiladi. Talabgorlar o'z natijalarini my.gov.uz saytining "Mening arizalarim" bo'limi orqali tekshirib, sertifikatni elektron tarzda yuklab olishlari mumkin.
Test natijalari xalqaro metodika – Rash modeli asosida hisoblangan. Talabgorlarga to'plagan bali asosida quyidagi darajalar beriladi:
- A+ daraja — 70 balldan yuqori
- A daraja — 65 – 69,9 ball
- B+ daraja — 60 – 64,9 ball
- B daraja — 55 – 59,9 ball
- C+ daraja — 50 – 54,9 ball
- C daraja — 46 – 49,9 ball
Sertifikat 2026/2027 o'quv yili uchun amal qiladi. Imtihondan muvaffaqiyatli o'tgan abituriyentlar oliy ta'lim muassasalarining bakalavriatiga kirish test sinovlarida imtiyozlarga ega bo'ladi. Xususan, A+ va A darajali sertifikat egalariga tegishli mutaxassislik fanidan maksimal ball beriladi. B+, B, C+, C darajali sertifikatlar uchun esa proporsional ball hisoblanadi.
Shuningdek, ushbu sertifikat akademik litseylarga kirishda ham qo'llaniladi. Sertifikatga ega o'quvchilarga tegishli fandan maksimal ball beriladi. Bu abituriyentlar uchun katta imkoniyat, chunki milliy sertifikat ularga qo'shimcha imtihon topshirmasdan yuqori ball olish imkonini yaratadi.
Milliy sertifikat tizimi o'quvchilar va talabgorlarning bilim darajasini xolis baholash, ularni rag'batlantirish va oliy ta'limga kirishda teng imkoniyatlar yaratishga xizmat qilmoqda.
Reklama
Izohlar (0)
Izoh yozish uchun tizimga kiring.