“Ijtimoiy reestr”dagi talabalarga kontraktning 50 foizigacha subsidiya beriladi

“Ijtimoiy reestr” talabalari uchun kontrakt subsidiyasi joriy etildi

Kasbiy va oliy ta’lim muassasalarida to‘lov-kontrakt asosida tahsil olayotgan ayrim talabalar uchun kontrakt summasining bir qismini qoplab berish tartibi belgilandi. Tegishli hujjat Lex.uz portalida e’lon qilingan.

Yangi tartibga ko‘ra, “Ijtimoiy reestr”ga kiritilgan oilalarning 14–30 yoshdagi a’zolari bo‘lgan, kunduzgi ta’lim shaklida o‘qiyotgan talabalar subsidiya olish huquqiga ega.

Qancha miqdorda subsidiya beriladi?

Talabalar kontrakt summasining:

50 foizigacha,
biroq BHMning 50 baravaridan oshmagan miqdorda

subsidiya olishlari mumkin.

Bu mablag‘ talabaning kontrakt to‘lovini qisman qoplash uchun ajratiladi.

Qaysi ta’lim muassasalari talabalari uchun amal qiladi?

Mazkur tartib quyidagi toifadagi talabalar uchun tatbiq etiladi:

davlat va nodavlat oliy ta’lim tashkilotlari;
kasbiy ta’lim muassasalari (kunduzgi shakl);
O‘zbekiston hududidagi xorijiy OTMlar va ularning filiallari;
bakalavriat va magistratura bosqichlari (kunduzgi ta’lim shakli).

Muhim: subsidiya masofaviy, sirtqi, kechki ta’lim shakllari, ikkinchi mutaxassislik hamda tabaqalashtirilgan kontrakt asosida o‘qiyotgan talabalarga tatbiq etilmaydi.

Qaror qanday qabul qilinadi?

Arizalar belgilangan tartibda ko‘rib chiqiladi. Subsidiya ajratish bo‘yicha yakuniy qaror “Mahalla yettiligi” tomonidan qabul qilinadi.

Ajratilgan mablag‘:

talaba bilan tuziladigan ijtimoiy shartnoma asosida;
bevosita ta’lim muassasasining bank hisobvarag‘iga o‘tkaziladi.

Talaba zimmasiga yuklatiladigan majburiyatlar

Ijtimoiy yordam olgan talaba quyidagi shartlarni bajarishi lozim:

semestr yakunida o‘rtacha o‘zlashtirish ko‘rsatkichi kamida “4” bo‘lishi;
volontyorlik loyihalarida ishtirok etish;
6 oy davomida “Mutolaa” loyihasi doirasida har oy kamida bitta kitob o‘qish;
6 oy davomida “Ibrat farzandlari” loyihasi doirasida xorijiy tilni kamida B1 darajada o‘zlashtirish.