Bog’chalarda yangi o’quv yili uchun 6 ta asosiy vazifa belgilandi

Maktabgacha ta'lim tashkilotlarining 2026-2027-o'quv yiliga puxta tayyorgarlik ko'rishi, ta'lim-tarbiya jarayonini zamonaviy talablar asosida samarali tashkil etishi hamda bolalarning har tomonlama rivojlanishi uchun zarur shart-sharoitlarni yaratish maqsadida yangi o'quv yili uchun 6 ta asosiy vazifa belgilandi.

Yangi o'quv yilidagi ustuvor yo'nalishlar

• "Ilk qadam" milliy o'quv dasturining uchinchi nashrini ta'lim-tarbiya jarayoniga joriy etish — 2026-2027-o'quv yilidan boshlab barcha davlat va nodavlat maktabgacha ta'lim tashkilotlari qamrab olinadi;
• "Bola, o'yin va pedagog" loyihasi asosida o'yinga asoslangan ta'limni bosqichma-bosqich joriy etish;
• "Quvnoq matematika" va "Bilag'on bolajon" o'quv-metodik majmualaridan samarali foydalanish;
• bolalarda ekologik madaniyat va sog'lom turmush tarzini shakllantirish;
• pedagoglarning kasbiy kompetensiyalarini uzluksiz rivojlantirish, zamonaviy ta'lim texnologiyalari, sun'iy intellekt va raqamli resurslardan foydalanish ko'nikmalarini takomillashtirish;
• maktabgacha ta'lim tashkilotlarida xavfsiz va rivojlantiruvchi ta'lim muhitini yaratish.

Yillik ish rejasini ishlab chiqishda har bir hududning ijtimoiy-iqtisodiy rivojlanish xususiyatlari, maktabgacha ta'lim tashkilotining mavjud shart-sharoitlari va pedagogik salohiyati inobatga olinadi. Asosiy vazifalarga qo'shimcha ravishda har bir tuman hamda tashkilot darajasida bittadan qo'shimcha vazifa belgilanishi mumkin.

Yillik asosiy vazifalarning ijrosi o'quv yili davomida muntazam monitoring qilinib, natijalari pedagogik kengash yig'ilishlarida muhokama qilinadi. Avvalroq maktabgacha ta'lim sifati haqida yozgan edik. InfoEdu.uz maktabgacha ta'lim sohasidagi yangiliklarni yoritishda davom etadi.