Maktabgacha va maktab ta'limi vazirligi tomonidan amalga oshirilayotgan “Kelajak uchun xorijiy til” loyihasi doirasida 10 ming nafardan ortiq o‘quvchi xorijiy til bo‘yicha milliy sertifikatni qo‘lga kiritdi.
Vazir E'zoza Karimova ma'lum qilishicha, loyiha 2025-yil dekabr oyidan Toshkent shahridagi barcha umumta'lim maktablarida yo‘lga qo‘yilgan.
Loyiha doirasida qanday ishlar amalga oshirildi?
Reklama
"Toshkent tajribasi" sifatida boshlangan loyiha doirasida poytaxtdagi 40 mingga yaqin 11-sinf o‘quvchisining xorijiy til bo‘yicha bilim va ko‘nikmalarini oshirish ishlari olib borildi.
Dastlab o‘quvchilarning til bilish darajasini aniqlash maqsadida MOCK imtihonlari tashkil etildi. Natijalarga ko‘ra ular darajalar bo‘yicha guruhlarga ajratilib, xorijiy mutaxassislar ishtirokida bepul mashg‘ulotlar o‘tkazildi.
Shuningdek, Bilim va malakalarni baholash agentligi bilan hamkorlikda o‘quvchilar milliy sertifikat sinovlarida ishtirok etdi.
Nechta o‘quvchi milliy sertifikat oldi?
Loyiha yakunlariga ko‘ra, Toshkent shahridagi 10 106 nafar 11-sinf o‘quvchisi ingliz tili bo‘yicha B1 va undan yuqori darajadagi milliy sertifikatni qo‘lga kiritgan.
Sertifikat olgan o‘quvchilar soni qariyb 6 barobar oshdi
Taqqoslash uchun:
| Sana | Sertifikatga ega o‘quvchilar soni |
|---|---|
| 2025-yil dekabr | 2 970 nafar |
| 2026-yil 1-iyul | 17 515 nafar |
Shunday qilib, xorijiy til sertifikatiga ega o‘quvchilar soni qisqa muddatda qariyb 6 barobar oshgan.
Xorijiy mutaxassislar soni ham ko‘paytiriladi
2025/2026-o‘quv yilida respublika bo‘yicha 1 518 nafar xorijiy til mutaxassisi jalb etilgan.
Yangi o‘quv yilidan boshlab esa ularning sonini 2 ming nafardan oshirish rejalashtirilgan.
Abituriyentlar bo‘yicha statistika
Bilim va malakalarni baholash agentligi ma'lumotlariga ko‘ra, 2026/2027-o‘quv yili uchun oliy va kasbiy ta'lim muassasalariga hujjat topshirgan abituriyentlar orasida 125 354 nafar talabgor chet tili bo‘yicha milliy yoki xalqaro sertifikatga ega.
Shuningdek, barcha talab etiladigan fanlardan milliy yoki xalqaro sertifikatga ega bo‘lgan qariyb 13 ming nafar abituriyent kirish test sinovlaridan ozod etilgan.
InfoEdu.uz o‘rganishicha, mazkur loyiha xorijiy tilni o‘qitish sifatini oshirish hamda milliy sertifikatga ega bitiruvchilar sonini ko‘paytirishga qaratilgan.
Izohlar (0)
Izoh yozish uchun tizimga kiring.