Yangi o’quv yili 1-bosqich uchun 7-sentyabrdan boshlanadi

Dolzarb qirq kunlik davri

Joriy yilning 20-avgustidan 30-sentyabrigacha bo'lgan davr oliy ta'lim tashkilotlarida "Dolzarb qirq kunlik" deb belgilandi. Bu davrda talabalarni yangi o'quv yiliga munosib kutib olish, ularni turar joy bilan ta'minlash hamda yuzaga kelishi mumkin bo'lgan muammolarni tezkor bartaraf etish tadbirlari amalga oshiriladi.

O'quv yili bosqichlar bo'yicha boshlanish sanalari

2026/2027-o'quv yili ikki bosqichga ajratilgan jadval asosida boshlanadi:

• 1-bosqich talabalari uchun — 7-sentyabrdan;
• 2-va undan yuqori bosqich talabalari uchun — 14-sentabrdan.

Bu tartib birinchi kurslikka kirgan talabalarga universitet muhitiga moslashish, hujjatlarni yakunlash va turar joy masalasini hal qilish uchun qo'shimcha bir hafta beradi.

Kontrakt to'lamagan abituriyentlar uchun ruxsat

Talabalikka tavsiya etilgan shaxslarga to'lov-kontrakt mablag'larini shartnomada belgilangan miqdor va muddatlarda to'lagunga qadar farmoyish asosida o'quv mashg'ulotlarida qatnashishga ruxsat beriladi. Ya'ni kontrakt to'lovi kechiktirilgan taqdirda ham yangi talaba darslardan orqada qolmaydi.

1-bosqich talabalari uchun tadbirlar

Yangi o'quv yili doirasida birinchi kurs talabalari uchun uchta asosiy tadbir tashkil etiladi:

• Talabalarni tantanali kutib olish;
• "Kredit ta'limi tizimiga kirish" haftaligi;
• "Talabalikka bag'ishlov" tadbirlari.

Mustaqillik darslari sentyabrda

Sentyabr oyida ta'lim tashkilotlarida "Yagona vatan, yagona xalq bo'lib, yangi hayot va kelajak yarataylik!" shiori ostida "Mustaqillik darslari" o'tkaziladi.

Darslar doirasida jadidlik harakati namoyandalari va qatag'on qurbonlariga bag'ishlangan mashg'ulotlar, ma'naviy-ma'rifiy tadbirlar, davra suhbatlari, uch avlod uchrashuvlari, viktorina va ko'rik-tanlovlar hamda sport musobaqalari tashkil etiladi.

Yangi o'quv yilini samarali boshlash bo'yicha amaliy tavsiyalar talabalar uchun yangi o'quv yili qo'llanmasida keltirilgan. Mustaqillik bayrami kunlaridagi dam olish tartibi esa 4 kunlik dam olish haqidagi xabarda yoritilgan edi.