Texnikumlarga 2026/2027 o’quv yili uchun hujjat qabuli boshlandi

2026/2027-o'quv yili uchun texnikumlarga onlayn hujjat qabuli boshlandi. Bu haqda rasmiy manbalar xabar berdi.

9-sinf bitiruvchilari uchun 570 ta texnikumda 166 ta kasb-hunar turi bo'yicha o'qish imkoniyati yaratilgan. Umumiy qabul kvotasi — 202 657 ta o'rin. Arizalar 1-20 iyul kunlari qabul qilinadi. Joriy yilda 34 foiz 9-sinf bitiruvchilarini texnikumlarga jalb etish rejalashtirilgan.

11-sinf bitiruvchilari uchun 641 ta texnikumda 276 ta kasb va mutaxassislik yo'nalishlari mavjud. Umumiy kvota — 134 570 ta o'rin, shundan 61 298 tasi davlat granti asosidagi o'rinlardir. Arizalar 10 avgustdan 10 sentyabrgacha qabul qilinadi.

Shuningdek, 14 ta Ilg'or kasbiy mahorat texnikumlarida 27 ta kasb va mutaxassislik o'rgatiladi. Ushbu texnikumlarda umumiy kvota 1 760 ta o'rinni tashkil etadi, shundan 1 640 tasi — davlat granti.

Hujjatlar my.edu.uz platformasi orqali onlayn tarzda topshiriladi. Texnikumlarda o'qish muddati tanlangan kasbga qarab 2-3 yilni tashkil etadi. Texnikumni tamomlagan bitiruvchilar keyinchalik OTMlarning 2-bosqichiga kirish imkoniyatiga ega.

Bu yilgi qabul jarayonida 9-sinf bitiruvchilarini texnik va kasb-hunar ta'limiga yo'naltirishga alohida e'tibor qaratilgan. Davlat dasturiga ko'ra, 2030 yilgacha 9-sinf bitiruvchilarining kamida 50 foizini texnikumlarga qamrab olish rejalashtirilgan.