San’at va madaniyat maktablarida o’qish va yashash xarajatlari endi to’liq davlat byudjetidan qoplanadi

Prezidentning 2026-yil 21-apreldagi PQ-150-sonli qarori bilan Madaniyat va san'at sohasida kutilgan islohotlarga start berildi. Eng muhim yangiliklardan biri — ixtisoslashtirilgan san'at va madaniyat maktablarida o'qish va yashash xarajatlarining to'liq davlat hisobidan qoplanishi bo'ldi. 2026/2027 o'quv yilidan boshlab Madaniyat vazirligi tizimidagi ixtisoslashtirilgan san'at va madaniyat maktablarida tahsil olayotgan barcha o'quvchilarning o'qish va yotoqxonada yashash xarajatlari to'liq Davlat byudjeti mablag'lari hisobidan qoplanadi. Ovqatlantirish xarajatlari esa byudjet va ota-onalar to'lovi hisobidan moliyalashtiriladi. Bu, ayniqsa, iqtidorli, ammo moliyaviy imkoniyati cheklangan oilalarning farzandlari uchun katta imkoniyat eshigini ochadi. Yana bir muhim o'zgarish — qabul tizimiga oid. Musiqa yo'nalishiga endi 5-sinfdan boshlab qabul amalga oshirilsa, raqs, teatr, xalq ijodiyoti hamda tasviriy va amaliy san'at yo'nalishlariga 9-sinfdan keyin qabul qilinadi. Bu yosh iqtidor egalarini aniq yo'nalishga erta yo'naltirish va professional tayyorgarlikni kuchaytirish imkonini beradi. Bitiruvchilar uchun ham katta imkoniyat — ularga bolalar musiqa va san'at maktablarida o'qituvchilik qilish huquqi berilmoqda. Ya'ni, san'at maktabining o'z bitiruvchilari keyinchalik shu sohada kadr bo'lib yetishishi uchun yo'l ochilgan. Shu bilan birga, Respublika musiqa va san'at texnikumi hamda Respublika estrada va sirk texnikumida "2+2" dasturlari joriy etiladi — bu o'quvchilarga 2 yil texnikumda, 2 yil esa amaliyot yoki oliy ta'limda davom ettirish imkonini beradi. Madaniy turizm va mehmonxona sohasida kadrlar tayyorlashga oid navbatdagi yangilik — 2026-yil 1-iyuldan boshlab tajriba tariqasida "Madaniyat mehmonxonasi" loyihasi ishga tushiriladi. Bu loyiha orqali san'at va madaniyat yo'nalishidagi talabalar amaliyot o'tab, mehmonxona biznesining o'ziga xos jihatlarini o'rganish imkoniyatiga ega bo'ladi. Prezident qarori bilan san'at va madaniyat sohasida nafaqat o'qish shart-sharoitlari yaxshilanmoqda, balki iqtidorli yoshlarni qo'llab-quvvatlash va ularning kelajakdagi kasb egallash yo'llari ham kengaytirilmoqda. Eng muhimi, endi iqtidorli bola — moliyaviy to'siqlardan qat'iy nazar, o'z qobiliyatini rivojlantirish uchun teng imkoniyatga ega.