Pedagog platformasida 700 dan ortiq bo‘sh ish o‘rni e’lon qilindi

Davlat maktabgacha ta'lim tashkilotlari va umumta'lim maktablaridagi vakant ish o‘rinlarini izlash hamda ularga onlayn ariza topshirish imkonini beruvchi "Bo‘sh ish o‘rinlari" bo‘limi Pedagog platformasida ishga tushirildi.

Maktabgacha va maktab ta'limi vazirligi ma'lumotiga ko‘ra, pedagoglar endilikda shaxsiy kabineti orqali respublika bo‘ylab mavjud vakant ish o‘rinlari bilan tanishishlari va o‘zlariga mos lavozimlarga onlayn ariza yuborishlari mumkin.

Yangi bo‘lim qanday imkoniyatlarni taqdim etadi?

"Bo‘sh ish o‘rinlari" bo‘limi orqali:

• fan va hudud bo‘yicha mos vakant ish o‘rinlarini izlash;
• tanlangan vakant lavozimga onlayn ariza yuborish;
• ish qidirish jarayonini soddalashtirish;
• ishga qabul qilish jarayonining shaffofligini ta'minlash imkoniyati yaratilgan.

Platformada 700 dan ortiq vakant ish o‘rni mavjud

Ayni paytda Pedagog platformasida 700 dan ortiq bo‘sh ish o‘rni e'lon qilingan.

Pedagoglar hudud, tuman yoki ta'lim muassasasini tanlab, o‘zlariga mos vakant lavozimlarga onlayn tarzda ariza yuborishlari mumkin.

InfoEdu.uz kuzatuviga ko‘ra, yangi tizim ish izlayotgan pedagoglar uchun vakant ish o‘rinlarini izlash va ariza topshirish jarayonini ancha qulaylashtiradi.

Saralash qanday amalga oshiriladi?

Ma'lum qilinishicha, nomzodlarni saralash jarayonlari shaffof va xolis mezonlar asosida tashkil etiladi. Bu pedagoglarga o‘z bilim va salohiyatini namoyon etib, munosib ish o‘rniga ega bo‘lish imkonini beradi.

Ixtisoslashtirilgan maktablar uchun arizalar qayerda qabul qilinadi?

Yangi tashkil etilayotgan hamda faoliyat yuritayotgan ixtisoslashtirilgan maktablardagi bo‘sh ish o‘rinlariga hujjatlar avvalgidek vacancy.piima.uz platformasi orqali qabul qilinmoqda.