Menejerlik sertifikati ustama uchun asos bo‘ladimi?
So‘nggi paytda maktab direktorligi uchun mo‘ljallangan menejerlik kurslarini tamomlab, sertifikat olgan o‘qituvchilar orasida bir savol ko‘p uchramoqda: ushbu sertifikat uchun 50 foiz ustama to‘lanadimi?
Amaldagi tartibga ko‘ra, bunday ustama barcha sertifikat egalari uchun emas.
681-son qarorda nima belgilangan?
Vazirlar Mahkamasining 2023-yil 25-dekabrdagi 681-son qarori bilan maktab direktori lavozimiga nomzodlarni menejerlik kurslarida o‘qitish va ularga sertifikat berish tartibi tasdiqlangan.
Unga ko‘ra:
- menejerlik kursida o‘qish huquqi bakalavr darajasiga va belgilangan malaka talablariga ega nomzodlarga beriladi;
- kurslar A.Avloniy nomidagi pedagogik mahorat milliy institutida tashkil etiladi;
- sertifikat maktab direktori lavozimi uchun tanlovda ishtirok etish huquqini beradi.
50% ustama kimlarga to‘lanadi?
Qarorning 2-b bandiga muvofiq, qo‘shimcha ustama faqat menejerlik sertifikatiga ega bo‘lgan rahbar xodimlarga to‘lanadi:
- maktab direktorlariga — 50%;
- direktor o‘rinbosarlariga — 30%.
Ya’ni, oddiy o‘qituvchi menejerlik sertifikatini olgan bo‘lsa ham, agar u direktor yoki direktor o‘rinbosari lavozimiga tayinlanmagan bo‘lsa, unga ustama to‘lanmaydi.
Qachon ustama to‘lanadi?
Agar sertifikat egasi:
- maktab direktori lavozimi uchun o‘tkazilgan tanlovdan muvaffaqiyatli o‘tsa;
- direktor sifatida ish boshlasa,
shundan keyingina uning oylik ish haqiga 50 foiz ustama qo‘llanadi.
Xulosa
Menejerlik sertifikati o‘qituvchiga avtomatik ravishda 50 foizlik ustama bermaydi. U faqat direktorlik lavozimiga tanlovda qatnashish huquqini beradi. Ustama esa faqat rahbarlik lavozimiga tayinlanganidan keyin to‘lanadi.
Javoblar (0 )