Markaziy bank asosiy stavkani yillik 14 foizda o’zgarishsiz qoldirdi

Markaziy bank boshqaruvi 2026-yil 16-sentabrdagi yig'ilishida asosiy stavkani yillik 14 foiz darajasida saqlab qolishga qaror qildi. Qaror inflyatsiyaning pasayish tendensiyasi davom etayotgani, biroq inflyatsiyani oshiruvchi ayrim xatarlar saqlanib qolgani bilan asoslandi.

Ya'ni joriy qat'iy pul-kredit sharoitlari yana bir muddat saqlanib qoladi.

Inflyatsiya va narx bosimlari

Avgust oyida umumiy inflyatsiya 6,2 foizgacha sekinlashib, pasayish tendensiyasini davom ettirdi. Bazaviy inflyatsiya 5,5 foiz doirasida shakllandi.

Shu bilan birga, narxi yillik 5 foizdan yuqori sur'atda oshayotgan tovar va xizmatlar ulushi ortib bormoqda. Bu iqtisodiyotda barqaror tus olgan narx bosimlari hali ham saqlanayotganini ko'rsatadi.

Aholi va tadbirkorlik subyektlarining inflyatsion kutilmalari ham pasayishda davom etdi. Ammo bu pasayish umumiy inflyatsiya sekinlashuviga nisbatan pastroq sur'atda kechmoqda, narx belgilash jarayonlarida inersiya ta'siri saqlanib qolmoqda.

Talab, kreditlar va xatarlar

Chakana savdo, xizmatlar sohasi va investitsiyalar dinamikasi iste'mol hamda investitsion talabning faolligini ko'rsatmoqda. Shu bilan birga, yalpi talabning ayrim tarkibiy qismlarida barqarorlashuv belgilari paydo bo'ldi.

Joriy pul-kredit sharoitlari ta'sirida iqtisodiyotga ajratilayotgan kreditlarning o'sish sur'ati bosqichma-bosqich maqbullashib bormoqda. Ijobiy real foiz stavkalari aholining jamg'arishga bo'lgan moyilligini qo'llab-quvvatlamoqda.

Tashqi tomondan xatarlar saqlanmoqda: jahon xomashyo, oziq-ovqat va energiya bozorlaridagi narxlarning yuqoriligi import narxlari hamda transport va logistika xarajatlari orqali ichki inflyatsiyaga bosim o'tkazadi. Ayrim asosiy savdo hamkorlari valyutalarining qadrsizlanishi sharoitida so'mning real samarali almashuv kursining yil davomida mustahkamlanayotgani import narxlari orqali bu bosimni yumshatmoqda.

Ichki xatarlar qatorida tartibga solinadigan narxlarni erkinlashtirish jarayoni ham bor: u ishlab chiqarish xarajatlari va xizmatlar narxlari orqali ikkilamchi inflyatsion ta'sirni kuchaytirishi mumkin.

Markaziy bank inflyatsiyani 2027-yil yakuniga qadar 5 foizlik targetga tushirish uchun zarur bo'lgan pul-kredit sharoitlarini ta'minlashda davom etadi. Asosiy stavka bo'yicha navbatdagi yig'ilish 2026-yil 28-oktabrga belgilangan.

Markaziy bankning talabalar uchun maxsus stipendiya tanlovini e'lon qilgani haqida avvalroq yozgan edik, ta'lim krediti shartlari haqidagi ma'lumot esa saytda alohida keltirilgan.