Maktabda tug‘ilgan kun nishonlash, dars vaqtida naushnikdan foydalanish va ayrim turdagi audio-video materiallarni ijtimoiy tarmoqlarga joylashtirish o‘quvchilar uchun belgilangan qoidalarga zid hisoblanadi.
Ta’lim muassasalarida o‘quvchilarning xulq-atvori va tartib-intizomiga oid bir qator talablar mavjud. InfoEdu.uz o‘rganishicha, ushbu qoidalarga rioya qilinmagan holatlarda o‘quvchi va uning ota-onasiga nisbatan tegishli choralar ko‘rilishi mumkin.
Maktabda nimalar taqiqlangan?
Belgilangan tartibga ko‘ra, o‘quvchilarga quyidagi harakatlarga yo‘l qo‘yilmaydi:
- ta’lim muassasasida tug‘ilgan kunni nishonlash;
- dars vaqtida naushnikdan foydalanish;
- ta’lim muassasasi faoliyatiga aloqador o‘qituvchi va o‘quvchilarning obro‘sini tushirishga qaratilgan munosabatlar aks etgan audio va videomateriallarni turli ijtimoiy tarmoqlarga joylashtirish yoki ulardan g‘arazli maqsadlarda foydalanish;
- boshqa shaxslarga nisbatan zo‘ravonlik qilish.
Mazkur talablar maktabdagi tartib-intizomni ta’minlash hamda ta’lim jarayoniga salbiy ta’sir ko‘rsatishi mumkin bo‘lgan holatlarning oldini olishga qaratilgan.
Qoidabuzarlik uchun qanday jazo bor?
Agar o‘quvchi belgilangan qoidalarga rioya qilmasa, dastlab uning ota-onasi yozma ravishda ogohlantiriladi.
Qoidabuzarlik holatlari takroran sodir etilgan taqdirda esa o‘quvchi ta’lim muassasasining ichki nazorat ro‘yxatiga olinishi mumkin.
Bunday vaziyatda ota-ona maktabga chaqiriladi. Ular bilan inspektor-psixolog ishtirokida suhbat o‘tkaziladi.
Ota-onalar nimalarga e’tibor berishi kerak?
O‘quvchilarning maktab ichki tartib-qoidalariga rioya qilishi nafaqat ta’lim muassasasi, balki ota-onalar uchun ham muhim masala hisoblanadi. Farzandiga maktabdagi mavjud talablarni tushuntirish va ularning bajarilishini nazorat qilish qoidabuzarliklarning oldini olishga yordam beradi.
InfoEdu.uz ta’lim sohasidagi muhim yangiliklar, o‘quvchilar uchun amaldagi talablar va boshqa dolzarb ma’lumotlarni kuzatib boradi.
